Daniel Lemi, Ubing a Chess Wizard Ti Ilocos Sur

Pinaneknekan manen ti 8 anios a ni Daniel John Lemi iti Vigan City ti supremidadna iti ahedres idi nagkampeon daytoy iti kalkalpas nga Allen Singson Cup Chess Tournament itoy a siudad kas paset iti Tobacco Festival.

Ni Daniel Lemi ti nagbalin a kampeon iti Under 12 category kabayatanna a ni Grandmaster Buenaventura Villamayor met ti kampeon iti Open Category.

Iti interview kenni Daniel, kinunana a dakkel a banag ti suporta kenkuana ti nagannak kenkuana tapno mamuli isuna iti daytoy nga ay-ayam.

“Agprakpraktis kami kenni Papa,” kinunana iti amana a ni Robert Lemi.

Iti interview met kenni Robert Lemi, lima pay laeng ti tawen ni Daniel idi nadlawanna ti naisangsangayan a talento ti ubingna.

“Nalakana a nasursuro, ket iti uneg iti makabulan ket sumangsango isuna a maki-chess.”

Malaksid iti kampeonatona iti Allen Singson Cup, ni Daniel met laeng ti kampeon iti torneo iti fiesta ti San Fernando, La Union, ken itay napalabas a tawen ket idiay pagilian iti Vietnam, nangiyalat isuna ti tallo a silver medals iti 9th ASEAN Age group Chess Federation.

Napadayawan payen daytoy nga ubing iti Padre Burgos Award gapu iti nagun-odna iti ahedres itay na napalabas a Kannawidan Festival ti probinsia ti Ilocos Sur.