Tobacco Festival Ti Candon City

CANDON CITY. Naragsak ken balligi ti panakarambak iti Candon City Tobacco Festival 2009 iti daytoy a tawen.

Daytoy ket kas maibasar kadagiti nagkaadu a tattao a turista ken kakailian a nangimatang iti programa.

Kangrunaan a dinupudop dagiti tattao dagiti naidumduma a programa a kas koma ti panakaisayangkat ti Miss Virginia Tobacco idi Marso 27, ti Miss Bikini Open idi Marso 28 ken ti Street Dancing Competition a naisayangkat iti daytoy met laeng nga aldaw.

Ti Marso 25 ket ramrambakan ti Candon gapu iti panakaideklarar iti umuna a Republika iti Filipinas babaen iti Ikkis Ti Candon babaen iti panangidaulo da Isabelo Abaya idi Marso 25, 1898.

Ti Marso 28 ket ramrambakan met gapu iti panakaratipikarna kas maysa a siudad nga iti daytoy a tawen ket addan iti maika-siam a tawennan.

Dinupudop pay a binuya dagiti tattao ti naidumduma a 2^nd leg Motocross Challenge, Airsoft Competition, DZTP 9 Ball Challenge, Concert ti Philharmonic Orchestra, Ilocandia Singsing Idol, Boxing, concerts ken dadduma pay a namagbalin a sibibiag ti Candon bayat iti selebrasion.

Pakairamanan met kadagiti bisita da senador Francisco Pangilinan, senador Ramon Revilla, Jr. Gobernador Deogracias Victor Savellano, Deputy Speaker Eric Singson ken dadduma pay.

Naray-aw pay dagiti tattao kadagiti nagkaadu nga artista a nangay-ayo kadakuada bayat iti selebrasion.

Ket agsipud ta ti Candon ti kangrunaan a producer ti tabako iti sangkapagilianan, narambakan daytoy babaen iti Panagdubla Contest a nakaangayan dagiti naduma-duma a pasalip mainaig iti tabako.

Ti Tobacco Festival ket panangitandudo ti siudad iti produkto a birhinia a kangrunaan a nangtulong tapno namaglupos kadagiti luglugar saan laeng iti Candon no di ket iti rehion uno nangruna iti Ilocos Sur.