Daniw Ni Apo Tony

Siak ti makaisangapulo nga anak ni Antonio Encarnacion. Bassitnak pay nga ubbing ngem agbasbasanak ti Bannawag, dagiti surat ni Papangko. Adda pay lang diay balay dagiti suratna. Napanen sabali a biag ni Papangkon idi pay 2004. Ngem uray pay awan ditoy ni Papa,adda isuna iti pusok, dagiti nasayaat nga adalna ken ti saan nga agkuskupas nga ayat na kadakami nga agkakabsat…

(Nainspirarak iti daytoy a komento ni Ma’am Mary Victory Encarnacion Ramirez iti poste a Punganay Ti Gumil a nakadakamatan ti nagan ni Apo Tony. Nagsukisokak ngarud ti daniw ni Apo Tony ket pagyamanak ngarud ni Apo Godofredo Reyes iti librona Da Angalo Ken Aran Ken Napili A Dandaniw ta nakitak daytoy. Nadakamat a naipablaak pay daytoy iti Bannawag idi 1964.)

TI BASSIT NGA EMPERADOR

Pinagbalinmo dayta indayon a tronom
A pagtamedan ‘toy ima a kanayon;
Pinagbalinmo nga init ti rabii, aldaw kabituenan,
O anian a panangituray, abakmo pay ni Kabunian!

Dagiti naimas a parbangon a tinukaymo
Iti panagkalis ‘ta sakam ken mangurat a kundiman
Rimbawan amin da isem ken ayek-ekmo
A puon pannakadamgis ti agek ‘ta pingpingmo.

O pirgis toy lasagko, O emperador ‘toy lailo,
Kinuldingmo ti kuerdas ‘toy puso
A mangilala iti lakayen a Ramut.

Ket ammom, Anakko, matenneb iti ayat a nasudsudi
Ti matiliwko a sinamar ti biag
A pakaawatak ‘ti imparabur ti Dios nga ingget dayag!