Baboy, Quarantined Gapu iti Virus

Gapu iti AH1N1, adu kadagiti tattao ti ma-quarantine tapno saan a maakaran wenno makaakar iti daytoy a sakit.

Ditoy Santa Lucia, Ilocos Sur, gapu met laeng iti virus, dagiti baboy ditoy ket na-quarantine tapno gapu iti agraraira a virus a nangapektar kadagitoy.

Gasut ti natayen gapu iti porcine reproductive and respiratory syndrome virus kabayatanna nga ad-adu pay ti pagbutbutngan a naapektaranen.

Dagiti reported a barangay nga addaan iti kastoy a kaso ket iti barangay Angkileng, Buliclic, Pila East ken Conconig East.

Ni Luciana Fernandez iti Angkileng ket nakaron ti lugina gapu ta 35 a burias ken 3 a takong ti natayen kadagiti tarakenna.  Nasurok iti P100, 000 ti gatad dagiti natay a baboyna.

Kabayatanna, kenni Alejo Balierta ket 2 a takong ken uppat a burias a tarakenna ti inkalinan gapu iti panakaapektar kadagitoy a virus. Adu pay kadagit agindeg ti nalugin gapu iti daytoy a panagraira ti nasao a virus

Makuna nga iti daytoy laeng a barangay, naka-idda amin a baboy ket makuna a narigatda a maagasanen.

Nangrugi daytoy a sakit ti baboy tallo a lawasen ti napalabas idi a lumabaga dagiti kudilda, kasarunon ti panagkakapsutda, ngesngesen, marigatan nga umanges agingga a ti dadduma kadagitoy ti natayen.

Nupay kunkunada a saan a makaakar iti tao daytoy a virus, ngem pagbutbutngan latta dagiti umili ti agsida.

Patbutbutngan a no saan a maagapan daytoy, agwaras pay daytoy iti dadduma a barangay no saan man iti kaarruba nga ili.