GUMIL Ilocos Sur- 47 A Tawenen

Rinambakan ti Gunglo Dagiti Mannurat nga Ilocano- Ilocos Sur Chapter wenno GUMIL-Ilocos Sur ti maika-47 a tawen a selebrasionna idiay Candon City Hall idi Oktubre 4.

Kangrunaan a bisita ni retirado a hues Vivencio Baclig nga agdama a national president ti GUMIL-Filipinas ken nagatendaran met ti nasurok duapulo a mannurat iti probinsia.

Indarirag ni Baclig ti panagkaykaysa koma dagiti mannurat, ta daytoy ti ad-adda pay a mangpadur-as iti bukod a literatura-ilocana.

            Naipaayan met iti pammadayaw a Pelagio Alcantara Award dagiti sumagmamano a kamengna gapu iti naaramidanda a panagsuratan.

Pakairamanan kadagiti napadayawan da retirado a Hues Vivencio Baclig, Danilo Antalan, Benjamin Pacris, Crisostomo Ilustre, Solomon Benitez ken Arsenio Cortez.

Kabayatanna, naangay ti programa gapu iti koordinasion da Edilberto Angco, nga agdama a presidente ti GUMIL-ILocos Sur, ni Mr. Jerry Malamion iti Candon City ken dagiti opisial ti GIS.

Simple ngem nagbalin a nakalalagip ti panakarambak iti gunglo nga pinundar ni daydi mabigbigbig a mannurat Pelagio Alcantara nga imbagian ni Djuna Alcantara iti kaaddana iti dayta a pasken.

Iti daytoy bulan ti Desiembre, manamnama nga agtataripnong manen ti grupo para iti christmas party ken eleksion iti baro a set ti opisiales.

Advertisement