300 Nga Aldaw: 1 Lubong: 1 Ayat

Idi punganay… adda ti ayat

Abril

            MAYSAAK met a nainggasatan ta naikkanak ti gundaway nga agpitik kas maysa a biag.  Nabiitak pay laeng iti daytoy umuna a lubongko, ket mangrugrugi pay laeng ti panakatubay ti pisikal a pakabuklak agraman ti panagprogreso ti mentalidad ken kapanunotak.

            Ayat!

            Daytoy ti simple a balikas ngem komplikado a rikna a gapu no apay nga addaak ita iti daytoy nadaruy a lubongko.  Agsipud ta no awan ti ayat, awan met ti panakainawko.  Daytoy ket bunga ti rikna manipud iti nagsupadi a seksualidad a narigat nga ilawlawag ti sikolohia ken kinapudno ngem nalaka ketdi nga iparang ti siensia.  Ti rikna a narigat a sarangten ti siasinoman.

            Napuotak laengen, maysaak a pitik ti biag… diak napupuotan a siak daytoy.  No aniaak?  Sadino ti yanko a lubong?  Sadino ti naggapuak?  Saludsod dagitoy a nalaka a mailawlawag ngem diak pay kayat nga awaten.  Ta mamatiak a ti amin a banag ken pasamak ket adda iti oras a naikeddeng kaniak.

            Ket iti daytoy a lubongko, ammok nga adu pay ti mainaw kaniak:  adu pay ti pagsayaatan ti pakabuklak.  Kaslaak pay laeng maysa a bituen nga adda iti law-ang a diak ammo ti pagtungpalak iti daytoy a gundaway.

            Iti lubongko—nasipnget, ngem gapu ngata ta awan pay silaw ti matak;  nawaya, ngem gapu ngata ta awan pay ti langak;  nadaruy, ngem gapu ngata ta awan pay ti bukodko nga anges.

            Saannak nga agdardaras kadagitoy a banag agsipud ta ammok a tunggal progresok ket adda ti pitik iti orasna.  Urayek laeng dagitoy a maldit ta di met masapul a sukisokek ken yaplikarko iti bagik.  Madanonto  daytoy, agingga a tunggal senso ket makompleto.

            Ubing pay ti inak (kas mariknak).  Dina pay nadanonan ti naan-anay a kinabalasangna.  Kasta met ti amak.  Agpadada nga agbasbasa.  Ngem gapu iti gagemda a mangtakkuat iti adbenturero ti biag iti maikaddua a lubong, dida naalwadan ket nabukelak.

            Nalaka laeng a nairayo ti inak iti amak ta adda pamuyaenna.  Daytoy met laeng ti rason no apay a nabatonbalani ti amak iti inak.  Ti inak ti nakaru ti panagayatna iti amak, nga impaayna amin tapno maipariknana daytoy, agraman ti dayaw a kupkupikopanna.  Ket ti naminsan a panakailaw-an ket napanuynoyan… iti namin-adu a daras.  Ket iti naminsan a panaglanglangda a dida nagkuenta ket nagtugmok ti itlog ken semilia ket nabukelak.

 

Mayo

            Andy, adda problemak.

            Ania ketdin ni  Sofia.  Don’t worry sa mga girls, fling lang sila, ikaw lang a loves ko.

            Awan ti periodko last month, madanagannak.

            Sweetheart, delayka laeng.  Umayka man ketdi iti abayko.  Umm, kisska man… nagbanglokan.  Tila pagdandanagam.

            Kasano no masikogak?

            Hey, tila ibagbagam.  Butbutngem laeng dayta bagim.  Remember this, dika agsikog ta adda met tumtumarem. Di ba?

            Wen!

            So, ania ti problema.  Delay laeng ti menstruation mo.  Patiennak!

            Kasano ngarud no masikogak?

            Okay! Okay!  Tapno dika agdanag, ipamuspusanta dayta.  Adda ti magatang a tumarem tapno agreglaka.  Agtomarka madamdama, uray ket di pay na-develop unay dayta.  Nalaka laeng a maikkat.

            Basol dayta!

            Sofia, dika man a shit.  Agkararagkanton tapno mapakawan dayta basolmo!

            Apay a basolko?

            Okay, basolta?

            Dinak sa met ngamin love?

            Hamman, love ka unay-unay.

            Apay ngarud a kastaka?

            Sika met, uray sika ket nagragsakka met, di ketdin?

            Kasano no di maikkat?

            Hamman!  Mayka man ketdi ta sibuganta dayta.

            Isu la ti paglaingam.

            Kayatmo met ngamin.  Inta ketdin.

            Sadino?

            Idiay heaven manen, ah.

 

Hunio

            Maawatak, ti biag ket saan a mapugsatan ti pannubok ken kinaranggas.  Uray sadino a lubong ti yanmo… ditoy man lubongko wenno iti sumaruno a lubongko.  Dumteng latta uray iti di namnamaen a gundaway.  Uray koma kayatmo a liklikan, ngem di a mabalin, ta ti keddeng ket sanguen dagitoy ken dangadangen… mangabakka man wenno maabak.

Kaslaak agkakapsut iti daytoy a gundaway, adda ti naidumduma a kemikal a nailaok iti lubong a pakatubtubayak.  Nabileg ti kemikal ta apaman a nairaman kaniak ket kasla mangliwengliweng ti riknak.  Kayatnak a paksiaten iti lubongko.

            Maysa daytoy a Diablo!

            Pagkapsutennak a kasla guyoden nga ipababa.  Uray ti lubongko ket awan maaramidanna no di sumurot iti mandar ti sabidong.  Pespesennak.   Kayatnak a patayen, ket kasla diak kabaelan a sarangten daytoy a puersa ti impierno.  Anian a bileg daytoy a kinadakes, ta uray ti lubongko ket kabaelanna a pasuroten?

            Ti lubongko ket kumbet a nakaru ti panangparigatna kaniak.  Pagkirriitennak a paksiaten.  Ti saem ken apges ket agkarayam iti amin a pakabuklak.

            Ammok a nagbaliwen ti marisko… naglitemnakon.  Kasla diak kabaelanen ti agbayag iti daytoy a lubong a siak laeng ti parsuana.  Kasla kayatkon ti sumurot iti sabidong a mangpapatay kaniak.  Napigsa ken nabileg ngamin daytoy a Diablo.

            Iti in-inut a panagkakapsutko, in-inut metten nga agpukpukaw  ti nakemko. 

            Adda dagiti saludsod nga umuk-ukirkir iti kapanunotak.  Apay nga ikaskastoydak?  Apay a kayatdak a paksiaten iti lubongko?  Awan met ti basolko kadakuada tapno ikastoydak?  Adda kadi karbenganda a mangpaksiat kaniak ket ayat ti nanginaw kaniak?  Wenno, agsipud ngata ta naglabes ti ragsak iti ayat ket nakitada ti kinadakes.

            Naglabsingda iti umuna ken kakaisuna a paglintegan iti lubongko:  ti karbengan nga agbiag ti kakaisuna a parsuana nga adda ditoy.  Ket siak daydiay.  Agsipud ta ayat ti nangbukel kaniak, awan ngarud ayat a mangpukaw kaniak.  Awan ngata met ti kaimudingan ti gura ken luksaw iti puso da inak ken amak.  Saan a maipalubos ditoy lubongko ti agsinumbangir a banag, awan ti yin ken yang ditoy.  Maymaysa laeng ti banag ditoy, maymaysa ti linteg… ta maymaysaak nga agbibiag ditoy. 

            Ket no adda man kinadakes, saan a ditoy ayanko, no di ket manipud dita ruar a lubong.  Kabaelan laeng a mandaren ti ruar a lubong ti yanko gapu iti kinasimple ken kinapakumbabana.

            Ngem agballigi ti kinadakes no itulok.  Adda pay laeng kaniak ti kina-inosente ken kinadalus, ket dagitoy ti kangrunaan nga igamko.  Diak itulok a kastoy lattan ti pamay-anda kaniak.  Ipariknak ti determinasionko nga agbiag.  Masapul a kumpetak iti kinadalus ti lubongko.  Diak paiyayos iti sabidong a mangpaksiat kaniak.

            Kasapulan ti determinasion nga agbiag, ta daytoy ti karbengak.  Ipariknak ti kinatibkerko kadagitoy a pannubok, agsipud ta inton naan-anayakton, ad-adunto pay ti pannubok a lak-amek… nadagdagsen pay.  Ket kadagiti nalaka nga aglusdoy ken impakitada ti panakaatiwda ket impariknada metten nga awan  ti gundaway nga agbiag.  Saannak a kasdiay!

 

 

Hulio

            Sofia, apay nga agsangsangitka manen?  Apay a kastaka kadagitoy napalpalabas nga aldaw?  Ania ti mapaspasamak kenka?

            Andy, masapul a pakasarannak!

            What!

            Diak mailemmengen ti panagdakkel ti tianko, saanen nga agkatnay kaniak ti paboritok a jeans ta nairuten iti siketko.  No ipilitko, mabekkel daytoy sikogko.  Madlawam pay ket ngatan a lawlaw dagiti isusuotko ita a bado.  Adun dagiti dumlaw kaniak ket ibagada a limmukmegak.  Adda payen dagiti mangibaga a masikogak kano.  Andy, saan a kanayon a makapaglibakak iti obserbasionda kaniak.

            Kunak man no nagtumarka?

            Wen met, ngem nakapet ngarud.  Andy, masapul a pakasarannak.

            Ania a kasar!  Diak pay ready iti aniaman a responsibilidad kas maysa nga asawa.  Ipennekko pay ti kinabarok. I’m still young. 

            Diak ammo ti aramidek, Andy.  No dadduma pay ketdin ket mapanpanunotko a gibusanen toy biagko.  Tulongannak metten, a.  Ammom metten ti pamiliak, awan ti pakasaritaanda iti kastoy.  Madanaganak iti mabalin nga aramidenda kaniak no maammuanda a masikogak.

            Okay!  Okay!  Dika agdanag, adu pay ti remediona dayta.  No saanna a denggen ti agas, adda pay sabali a wagas.

            Ania ti kayatmo a sawen?

            Don’t worry, okay.  Itatta met laeng, solbarenta daytoy a problema.  Adda ti papananta.

            Sadino?

            Umayka ketdin. Awanen ti adu pay a damag.

 

            Sadino ti yanta, Andy?

            Iti lugar a mang-solve iti problemata.

            Kasano a masolbar?

            Babaen iti baket nga agnanaed ditoy.  Iparegregta dayta sikogmo!

            Ania!

            Apo!  Apo!

            Apay nakkong, ania ti masapulyo?

            Ditoy kadi ti taeng ni baket Sianang… ti mangngilot?

            Siak!

            Adda ngamin problemami, ket ditoy ti nangituronganda kadakami a mangrisut iti pagdandanagan daytoy girlfriendko.

            Dagiti ubbing a talaga, kuyog-kuyog, pakaalaan ti sikog;  kibinkibin, pakaalaan ti ubing.

Sika kadi balasangko ti agparegreg?  Da’tanto ket, dikayo makaur-uray.  Ania ngay?  Nabuke. Sa ita, kayatyo nga iparegreg.  Sarita a naruay a mangmangegkon kadagiti kayatna ti agparegreg kaniak.

            Andy, diak kayat!  No immanugotak man idi nga uminom iti pagparegla, daydiay ta mariribukannak la idi.  Pinilitnak ken binutbutengnak.  Ngem ita, saannak nga umanugoten. Tallo a bulannan daytoy anakta ditoy tianko.

            Kunak man no problema dayta.  Ti problema ket solbarenta.  Adtoytan, apagbiit laeng, napunaston ti parikut.  Ditanton agdandanag.

            Saan a kastoy ti kayatko a panangrisut iti problema.  Ti kayatko ket pakasarannak, tapno adda rupak a sumango kadagiti nagannak kaniak.

            Hoy!  Dikaman nga agin-inarte dita.  No dimo kayat, di saan, ngem dinak iramraman dita.  Saanmo nga ikamat kaniak, ta dika pagtatakkunan a pakasaran, dangnga!

            PAK!

            No dinak pagtatakkuanan a pakasaran, dika met a kasapulan.  No dimo kabaelan a takderan daytoy, kabaelak nga isakad uray awanka.  Takrut!

            Ah, kasta… goodbye ngaruden, a.  Thank you laengen kadagiti nararagsak a kanito nga insangbaymo kaniak.  He-he!  Ibatikan.

 

Agosto

            No adda dagiti pannubok a sumangbay kaniak manipud iti ruar a lubongko; ad-adu ti sagabaen ti inak.  Saan a mailinged kaniak dagiti nadadagsen a rabii ken aldaw a sumangbay kadakami.  Mariknak ti dagensen ti barukongna.  Ti riribuk iti panunotna.

            Kayatko a tulongan ti inak tapno agbalin a natibker a sumango kadagiti pagkurosan iti biag, nangruna iti pananginawna kenkuana.  Masapul a nabileg isuna tapno natibkerak met.  No nalupoy isuna ket nalupoyak met.  Ngem ania ngata ti maaramidak manipud ditoy lubongko.  Ah, ti panagkuti-kutik ket makatulong ngata kaniak.  Wen, ta mariknak no kua ti aprosna. Mangipaay iti lag-an iti riknana, ken isem iti bibigna, agraman ti bang-ar iti barukongna. 

            No kabaelak la koma nga arakupen tapno maipariknak ti napalaus a panagayatko kenkuana, ta bareng ti bara ti bagik ket makaipaay kenkuana iti positibo nga enerhiya iti negatibo a mapaspasamak kenkuana.  Ngem diak kabaelan nga aramiden daytoy… saan pay kadagitoy a gundaway.

            Mariribukanak no apay a kasta metten ti napasamak iti ayan-ayat da inak ken amak.  No apay nga immartap ti gura ngem iti ayat nga adda iti barukongda.  Wenno makabartek kadi met ti sobra nga ayat?  Ket dida ammon ti nagtungpalanda.

            Ngem ngata, saan pay kadagitoy a gundaway a mailawlawag kaniak dagitoy a pakaburiboran.  Ken ngata, awan pay karbengak a mangbirok iti sungbatna. Ta dagitoy ket adda iti maikadduanto a lubongko.  Idiay ti oras a panangsungbat kadagiti saludsod.  Inton madanon dayta a panawena, ammok, maawatakto amin.  Kadagita nga oras, no maipalpalubos, matulongakto ti inak.

 

Setiembre

            Ania, masikogka?

            Pakawanendak koma, Mommy, Daddy!

            Inka saraken dayta nobiom, ita met laeng, tulagentayo ti panagkasaryo.  Diak kayat ti maibabain gapu iti dayta a sikog.  Ania laengen ti kunaen dagiti makaam-ammo kadatayo ditoy Cagayan.

            Binaybay-anakon ti ama ti sikogko, Mommy.  Kayatna ngamin nga iparegreg ket nagkedkedak.

            Ania!—saan a mabalin.  Maysaak a guidance counselor iti unibersidad, ania laengen ti kunaenda:  nga aginlalaingak a mamagbaga ngem diak gayam kabaelan a balakadan ti barairong nga anakko ta nagsikog a balasang.  Diak laketdi awaten dayta.  Siak, ni Prof. Elizabeth Sabado, presidente pay ti Lions Club International, maysa nga apostolada, asawa ni Konsehal Alfonso Sabado, mararaem a pulitiko ken manamnama a mayor iti umay a tawen—ita, addaan iti anak a nagpasngay a balasang.  Tinarayan ti lalaki.  Saanko pulos a maaklon dayta, Sofia.  Pulos!

            Pakawanennak koma, Mommy!

            Pakawanen!—tangaka ketdi.  Kunam la maibusanka ti lalaki.  Ibabainnakami ketdin.

            Daddy!

            Baka kayatmo ti agbakasion idiay Hawaii, igatangankan ti tiket.  Oh, don’t worry, ikkanka ti kalkalainganna nga allowance, Sofia.

            Daddy?

            Maawatanakami koma, anakko.  Dim’ la ngamin pinanunot ti kasasaad ti pamiliatayo iti sosiodad.  Mabigbigbig ken pagtamtamdagan dagiti umili.  Ket daytoy nga estadotayo ket marakrak gapu iti napasamak kenka.  Nakababain ti pagtungpalantayo.  Sitayo ti pagsasaritaanton dagiti umili.  Katkataawandan ti liklikudantayo.  Kasano ti naganko… ti nagan ni mommym!

            Ala, wen, pumanawak ditoy San Fernando, Mommy, Daddy.  Tapno masalimetmetanyo dayta dayaw a kunkunayo.  Tapno saan a mamulitan dayta kinadayaw ken kinataknengyo.  Tapno di bumaaw dayta kinalatakyo.  Pumanawkami ken ‘toy apokoyo.

 

Oktubre

            Iti panaglabas ti aldaw, in-inut met ti panakatubayko.  Panakatubay a kasla maysa nga arapaap nga in-inut a magun-od.  Pudno nga awan pay laeng makaatiw iti Mannakabalin kas maysa nga iskultor ken mannurat.  Perpektoak… ta addaak pay laeng iti lubong ti kinaagmaymaysa.  Nupay adu dagiti manglaplapped iti ilulung-awko iti bangir a lubong, mariknak a tumibtibker ti inak, a kangrunaan a rason tapno bumilegak met.

            Adda imakon ngem diak pay makaiggem, ngem makariknaakon.  Adda matakon ngem diak pay makakita, ngem adda silawkon.  Adda pusokon ngem diak pay makarikna, ngem makaayatakon.

            Amin dagitoy, gapu iti inak a mangipatpateg kaniak.

            Ania pay ti di namuli kaniak?—rupa, bagi, saka, puso, panunot… adda aminen a kasapulan a matubay tapno awatennak iti sumaruno a lubongko.  Ammok payen ti maragsakan.  Maipariknak daytoy iti inak babaen iti panangiyunnatko iti imak ken sakak.  Ket no aramidek ti kasdiay, anian a ragsak ti inak.  Aramidek ti kasdiay tapno maipariknak ti kinaragsakakko a diak maibalikas.  Kayatko a makita daytoy ti inam bareng tumibker tapno maaddaan iti determinasion ket agbalin a positibo ti interpretasionna iti mapaspasamak iti biagna.  Ngem saan pay a kadagitoy a gundaway, ngem dandanin, kas ipaneknek ti panagpitik ti oras.

            Kayatkon a makita dagiti nalalangto a ruot iti katanapan, tapno innakto sadiay agay-ayam.  Ti narurukbos a kaykayo iti kabakiran ket innak ulien ket agalaak ti bunga ket kanenmi ken inak bayat iti inkami panaginana iti linong.  Kayatkon a denggen  dagiti nasam-it a sagawisim dagiti billit wenno danggayan ti panagtayabda iti bantay Sierra Madre.  Kayatkon ti aglangoy iti nalitnaw a danum a nagtaud iti gukayab ti Callao ket agkemmegak ti ikan tapno itunok a pangaldaw.  Kayatkon a buyaen ti panagbannawag ti init iti baybay ti Pilipinas iti daya.

            Adun ti kayatko nga aramiden.  Ket magagaranak kadagitoy umunanto a pagteng ti biagko iti maikaddua a lubong.

 

Nobiembre

            Anakko, nalpasen ti panagsangsangit ni Mamangmo.  Ti sigud a nalupoy a babai ket naaddaan iti kired ken timibker ti pangngeddengna gapu amin iti panagayatko kenka.  Kayatkanto a makita.  Maarakup.  Agyamanak kenka, ta sinursuruannak a sumango kadagiti pannubok ti biag.  Pinaturedmo ti pakinakemko, ket kinabaelanka nga itangsit iti lubong a paggargarawak.  Kabaelak itan a sangduen ti pannubok.

            Liwliwak itan ti pananguray iti naindaklan nga aldaw a panangipasngayko kenka.  Sika ti anghelko.  No dumtengto dayta nga aldaw, sarabuenkanto ti naindaklan a panangitangsit iti sangalubongan.  Sipapanakkelkanto nga itag-ay.

            Babaika kano, anakko, kas impaltiing ti 4D ultrasound.  Nasalun-atka kano.  Ket agayamanak unay.

            Maipapan kada grandpa ken grandmam, diak ida mapabasol itan.  Ngem ammok, nga apaman nga isemamto ida, malunagto met laeng ti bimmato a prinsipio ken panniriganda iti pamilia.  Nangruna ket ngatan no maarakupdaka nga umuna nga apokoda.  Agtedtedto met ti lua kadagiti matada, ngem lulua ti ragsakto dayta.

            Ni Papangmo… naaklonkon a dikami a para iti tunggal maysa.  Diakto mabalin a pagsadagan iti panangtarabay kenka.  Ngem no birokennakanto, ket arakupennaka, dikanto ipaidam… karbengam ngamin daydiay, anakko, kas amam.  Ket no addanto aldaw a maamirisna a napategak kenkuana, mapakawanko ket nakasaganaak a mangaklon iti panagayatna.  Ket bareng iti dayta a kanito, awanto pay sabali a mangikot iti pusok.

            Uray dika agsasao, ngem no aprosak daytoy tianko, mariknak ti isusungbatmo babaen iti panagkutim.  Maawatannak.  Ay-ayatennak.

            Nee, diak metten napuotanen, anak, adda met gayamen nagtedted a luak.  Dika madanagan, anak, ta daytoy ket saanen a lua ti panagpasanaang.  Lua daytoy ti di mailakanbas a ragsak—agsipudta addakanton iti biagko.

            Angeline, wen, isunto ti naganmo ditoy maikaddua a lubongmo.  Maysaka ngamin a kirubin iti biagko. 

            Adun ti naglabasanta a pannubok.  Addaka pay laeng ditoy tianko, ngem adun ti sinagabam.  Umuna, saannaka tinakderan ni Papangmo.  Maikaddua, dinaka inako dagiti apongmo.  Ginandatka pay a papatayen babaen iti panagtomarko iti pagparegla—daydiay ti kadak’san nga inaramidko kenka.  Nalakaak a naiduyos iti palab-og ni Andy.  Diak koman mapakawan ti bagik.  Imbag laketdin ta natibkerka.  Dimo intulok ti nangisit a pangta iti biagmo.  Ngem ammom, idi kayatnaka nga ipailot ni Papangmo, diakon nga inpalubos.  Saanen a sumrek iti konsensiak.  Ti panangbiag kenka ket maysa a karbengak ken pagrebbengak kenka.  Ta asidegka iti pusok.

            Natibkerak ita gapu kenka.  Ket natibtibkerak inton maipasngayka.  Anianto man problema ti sumangbay kadata, sanguenta.  Dikanto pulos baybay-an. Daytoy ti karik kenka.

 

Desiembre

            Nabusnag man ti aldaw ita.  Dagiti atap a sabong iti kabakiran ket namaris unay iti panagukradda.  Ti ayamuom ti ilang-ilang iti paraangan ken malang-ab ket di makauma ti banglona.  Dagiti alimbubuyog ket agiinunada a mangsisip iti nektar ti santan.  Dagiti kulibangbang ket maay-ayo a mangsippa-sippayot iti naduma-duma a maris ti sabsabong iti hardin.

            Nagsayaat ti singising ti init.

            Oras laengen ti ur-urayek tapno lumaw-angak iti tian ni inak iti daytoy naisangsangayan a kaaldawak.  Pitik laengen ti maur-uray ken addanton iti imak ti gundaway a lumasat nga agturong iti sabali a lubong.  Kamaudiananna, nagtengakon ti ungto ti dana a pagpagnaak iti umuna a lubongko.  Siam a bulan a panakamuli.  Mariknak met laengen ni lawag.  Arakupennak met laengen ni angina.  Pasangbayennak met laengen ni aldaw.  Ania ket ngatan ti imnasna ti agbiag ken agwaywayas iti lubong a nawaya.

            Karbengan nga agbiag.  Namnamaek daytoy—kas iti karbengan ti danum iti baybay nga umagek iti kadaratan, wenno ti raya ti init nga agay-ayam iti law-ang.

            Nakasaganan ti inak iti daytoy naindaklan nga aldaw a panagdappatko iti lubong a sumaruno iti nakaikariak.  Awanen ti lapped.  Awanen ti sakit ti nakem a mangapektar kenkuana.

            Ket mariknakon ti maysa a nabileg a puersa a mangay-ayo kaniak tapno sumurot.  Guyguyodennak.  Diak makapagtukkiad.  Itulokko lattan ti riknak.  Saaannak a mailawlaw ta mariknak dagiti ima a mangiturturong kaniak.  Kaslada ibagbaga kaniak—ala, sumangbayka iti kanaganam!

            Saan gayam a kasla sonata ti ibabalasiw iti sabali a lubong.  Ti puersa ket bumilbileg gapu iti eddek ken pug-aw ti inak.  Wen, ibagbagana nga agdanggaykami, no ageddek, palubosak ti riknak.  Isu met gayam a nainggasatan ti maipasngay ta narigat ti agdaliasat.

            Impagarupko lattan a kasla maysa nga indayon ti nabileg a kunnot a mangguyguyod kaniak.  Mariknam met ti in-inut a panakipagmaymaysa ti nakipet a dalan ta makidanggay kaniak. Ket bayat idadaliasatko iti dayta a dana a nagbaetan ti dua a lubongko, adda gangganaet a rikna nga immagibas kaniak. Rikna a siak laeng ti makaammo, ngem diak mailawlawag.

            Ammok met nga iti baro a lubongko, mangrugiak manen iti sabali a dana, kas met laeng idi mangrugiak ditoy panawak a lubong.  Baro a lubong, baro a dana. Malpaskon ti umuna a pagteng ti biagko.  Mangabelak iti baro a pakasaritaan.

            Ngem sakbay a panawak daytoy lubongko.  Kayatko nga ibuksilan daytoy a rikna iti tunggal maysa…

            Agyamanak.

            Kamaudiananna, nagballigiak a nangbalasiw iti baet ti dua a lubong.  Ket kayatko ti agragsak. Agrag-o iti daytoy naindaklan nga aldaw iti di maipapas a rikna.  Kayatko nga ipukkaw iti lubong dagiti tao… Adtoyakon!

            UHA!  UHA!   UHA!

Iti punganay… adda ti lawag…

                                                            Gibus

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s