Iluko.com Gathering 2008

iluko2

To name a few: Atty. Beligan, Manolito Gaspar, Pitong Cabreros, Jeric Domingo, Dr. Raras, Linda Bulong, Arlane Manzano, LJ Galleta, Monica Smith, Danny Antalan.. and others

Ket nagsasarak dagiti Ilocano a makunkuna a nangisit ti sikona nga agpalpalailang iti iluko.com—ti makuna a kasikatan a web portal a pagturturongan ken pagiinniliwan dagiti Saluyot.

Dagitoy dagiti Ilocano nga adda iti ballasiw-taaw ken adda ditoy Filipinas a no dadduma, wenno masansan, nga agsasarak iti cyberspace tapno makipinnadigo kadagiti katkatawa, sarita, daniw, ladawan ken dadduma pay.

Ket agsipud ta masansan ngarud nga agsasarak tayo iti law-ang iti iluko.com, naplano ket ti iluko.com gathering. Tapno iti kasta, makapagsasaraktayo iti personal, ken naan-anay a maam-ammotayo ti tunggal maysa. Wen, tapno agiinniliw.

Naduma-duma a rason no apay nga addatayo: ken Johnnyric iti Maui, Hawaii, “… gapu iti literatura, makaadal iti naipaskil, past time, tapno makisinnarita ken makisinnutil”. Ken ni Arlane iti Vancouver, Canada, “…literatura, tapno agbalin met a sabali a nagan wenno maaddaan iti maikaddua nga identity, maikiinniliw.” Ken ni Monica iti Alberta, Canada, “…no nabannogak manipud trabaho ket manglinglingay, makisinutil, mangikkat ti stress”. Ket ni LJ iti Filipinas, “sinapulko ti kina-Ilokanok ditoy, nangbirok iti roots, friendship online ken panangpatadem iti literary skill.”

Naduma-duma a rason, ngem maymaysa ti mangsungbat… ti sapot ni Manong Andy Barroga, ti web administrator.

Naplano ket ngarud ti iluko.com gathering 2008. Ti kaunaan a panagsasarak dagiti Ilocano a sumsumrek iti sapot ti daytoy a web space.

Adu ti nagkari nga umay, ngem daksanggasat ta manmano ti nakasustinir nga immay.

Ngem ketdi, naragsak ti pagteng. Naragsak a naidumduma nga uray intono kaano man ket addanto lattan a naimaldit iti lagip dagiti timmabuno iti nangayeg nga aldaw dagiti Ilocano a nagisakripisio ti oras, gundaway, kuarta ken trabaho, tapno laeng makagteng iti Ursa Major Beach Resort, iti barangay Apatot, San Esteban, Ilocos Sur idi Desiembre 27, 2008… aldaw iti Sabado.

TI PLANO A GATHERING

Marso 2007, agarup dua a tawen ti napalabasen, idi naibaga kadatayo ni Manong Andy ti planona nga Iluko.com gathering. Ti kangrunaan a panggep, tapno makapagsasarak iti personal dagiti narway a sumarsarungkar iti daytoy a sapot dagiti Ilocano.

Naibaga daytoy ni Manong Andy kada marengski Arlane Manzano (Canada) ken Monica Smith (Canada), nga insigida met a naragsakan iti daytoy a panggep.

Naimaldit ti maysa a thread iti Dap-ayan tapno ditoy daytoy a mapagsasaritaantayo. Nabukel pay ti komite nga indauluan ngarud dagiti marengski a nairamanan ni LJ Galleta (Cagayan, Filipinas).

Adu ti immanamong… adu ti naragsakan. Adu ti nagtung-ed. Adu ti nagkari a sidadaanda a tumulong iti ibaballigi daytoy a panggep. Dagitoy dagiti kadap-ayan iti ballasiw-taaw a kas koma dagiti naggapu iti Canada, California, Europa, Hawaii, Mainland USA, Asia ken ditoy Filipinas.

Adu dagiti proposals, kas koma no sadino ti pangisayangkatantayo daytoy: iti Cagayan, Ilocos Norte, Ilocos Sur? Kaanno: summer ditoy Filipinas iti bulan ti Abril wenno summer ti Canada iti bulan ti Desiembre?

In-inut, nagbaskag daytoy a planotayo. Ket natinong ngarud daytoy a panagsasarak iti bulan ti Desiembre, ditoy Ilocos Sur, babaen iti panang-host ni Marengski Arlane—a nupay adda iti Canada iti daytoy a gundaway ngem agawid tapno isagana daytoy a panggep.

Babaen iti thread nga Iluko.com gathering iti Dap-ayan, adu dagiti nangibaga ti interesda a makiinniliw kadagiti kaaruba iti daytoy a pagtaengan iti internet. Ket iti sakbay nga innem a bulan, in-inut a naplantsa ti programa.

Masapul nga agbayad iti P1000 a registration ti umay, adda ti registration form a masuratan a naituding kenni LJ… ken dadduma dadduma a komite ket naiwaras kadagiti maseknan.

Iti kinaad-adu ti agturturong iti iluko.com, adda sumurok-kumurang 50 a nangiyebkas ti interesda. Saanen a dakes daytoy a bilang, ta adu pay ketdin no ar-arigen.

Ket agsipud ta Desiembre ken adu ti okasion kas koma iti fiesta ti ili ken kagiddan ti paskua, adu dagiti balikbayan ket nagbalin a problema ti pagdagusan. Naituding ngarud iti Ursa Major Beach Resort ti pakaangayan. Nai-reserba dagiti kuarto a pagturongan ken ti hall a pakaisayangkatan ti programa.

Ngem bayat nga umas-asideg ti aldaw, adda dagiti mangibagbagan a saanda makaumay gapu iti naduma-duma a rason.

TI GATHERING

Kaaldawanna, madandanagan dagiti tres marengski tayo a da Arlane, Monica ken LJ agsipud ta kasla saan metten manayunan ti attendance. Ala, addadan pakairamanan ni Pitong Cabreros ken Jeric Domingo, ngem kasanon no awanen ti umay.

Ta idi kalman, aldaw ti Biernes, kabayatan a maikabkabil ti red ribbon iti kalsada a kas tanda a pagturongan iti Ursa Major, awan met laengen ti kulibagtong dagiti dadduma.

“Datayonto lattan, a, no awan ti umay. Bagitayonto amin a regalo.” Inyangaw pay ni parengski Jeric Domingo (Maui, Hawaii) a maysa kadagiti kasapaan nga immay.

Iti bigatna, addan a kasangsangayotayo iti Ursa Major dagiti marengski, da Jeric, Atty. Leo Beligan (California) ken ni Mrs. Beligan, Manong Pitong Cabreros iti Filipinas, Manolito Gaspar ti LA, USA, ni Mitch. Ket in-inut a rumanraniag ta umad-adu ti sumangsangpet… Linda Lingbaoan Bulong, Dr. Jaime Raras, Danny Antalan ken dadduma pay.

Adda kano pay ni Marvin Acosta a nagparang… ngem iti rabiina.

Ay, iti bigatna, awan unay ti garakgakna. Ta malaksid iti panagkanta da Danny ken LJ iti videoke, ket ad-addun ti estoriatayo iti sirsirok ti logo. Kasla nalamuyot ti ragsak.

Ngem idi mangrugin ti pangaldaw, mangrugin ti karibusotayo. Imbag man ta insuro ni parengski Danny ti pananglukat ti maritangtang. Ay, adu kadatayo a timmabuno ti damdamo a nakaraman iti nananam a bagas ti maritangtang. Umapgad ngem naimas met.

Ket anian, adda pay gayam maysa a lechon. Ngem nee, kasla di metten nagdanagan ti cholesterolnan, ta kasla awan metten ti tabanan. Naim-imas met ngamin ti nairamen a karimbuaya a kasla nangikkat iti mantikana.

Baso man, kuna ni Apong Leo, ta awan met ti pangigupan ti digo ti sinigang a natangriban nga ikkan. Nagganas ket ngatan nga igupenen.

Saan sa metten nagaraw ti adobo ken kalding, ta nee, nabutittit tayo metten.

Palpa.

Iti malemna, mangrugin a rumay-aw dagiti paspasamak kadatayo: adda dagiti simmangpet nga estudiante ni Dr. Raras ket isudan ti singertayo. Ket iti madamdama pay, adda dagiti kakailian iti Banayoyo a nakakawesda metten iti wanes ken adda awitda a gangsa ken patit dagiti lallaki ken kabayatanna a dagiti babbai ket nakasuotda met iti ingay.

Ayna, agtadektayo marengski.

Indauluan ni Banayoyo Vice Mayor Thelma Galang dagiti kakitkitongan ti Naguimba tapno mangipabuya iti naisangsangayan a panagtadek.

Malaksid kadakuada, adda pay da Banayoyo Councilors Santos Bayaya ken Mike Perez. Ket nakidanggay payen ni Burgos vice mayor Rio Balbalan iti pabuya. Adda pay ni Jennylen Lingbaoan, a kaanakan ni Manang Linda, tapno makitadek met iti daytoy nga okasion.

Sakbay ti tadek, insayangkat pay ni Atty. Beligan ti maysa a ritual ti tribu ti Bago a panangdawat iti bendision tapno agballigi ti programa. Inikkanna ti basi ti baso sana linidok.

Napatit dagiti gangsa, nagpasango dagiti naka-wanes a lalaki ken nakatapis a babai ken ditan nga inkudtar-kudtarda ti sakada a kas mayanatup iti ritmo iti tukar manipud iti gangsa.

Ti tadek ket maysa a sala a dagiti tribu iti amianan ti Filipinas a sadino ket masansan a masala daytoy dagiti babbaro ken babbalasang. Kasla koma innarem ti balasang ken baro. Ti baro ket kasla kawitan a mangsarigsig iti balasang a kasla kampay upa met. Yukradna ti iggemna a kamen nga isu ti pangpaamona bayat iti panagsalana. Aggibus daytoy a sala babaen iti panangkupinda iti kamen sana intakkab iti kinulpi met ti balasang.

Kalpasan dagiti tumatadek nga i-Naguimba ken ni balasang Jennylen, saan a nagpaudi dagiti Marengski ken Parengski ti iluko.com, ta idi naitanggaya kadatayo ti kamen, ditan nga inkudtarkudtar tayo metten ti sakatayo. Ket wen, uray di unay ammo ti panangikudtar iti saka, mayat lattan, ti napateg ket mapadasan ti tumadek. Ket anian, nagbalinen a naragsak ti malemtayo. Ta ne, uray dagiti sabali a grupo nga agramrambak iti daytoy nga aldaw ket immayda metten ket nakitadekdan. Nagbalinen a tribal festival ti iluko.com gathering a maisaysayangkat iti igid iti nalinak a baybay.

Nakitayo la koma no kasano ti panagkumpas da Atty. Beligan, Arlane, Pepito, LJ Monica, Manang Linda ken isu aminen iti patit ti gangsa. Umapal laketdi dagiti dagiti dina pay napadasan ti nagtadek. Mayat gayam, marikna ti kinapateg ti kultura no kastoy ti pabuya.

Malaksid iti tadek, adda pay ti nag-uggayam.

Simmaruno ti panakaited iti regalo iti tunggal maysa.

Kunam pay, nagbalin a nadaeg ti programa iti daytoy nga aldaw.

Iti rabiina, numan pay adu ti nagawid kadagiti dadduma a marengski ken parengski tayo, adda latta met dagiti nagbati ken naturog iti resort. Ket dagiti nagtalinaed ket nagtultuloy ti inniliwtayo. Kasla di mauma da parengski Danny ken Marengski LJ nga agkankanta iti videoke. Ta adda pay nakakabil nga agingga alas nuebe la koma ti videoke, ngem labes alas diesen ket mayat latta ti birada.

Nasapa a naturog dagiti kadduatayo a Apong Leo ken dadduma pay a medio nataenganen, ngem nee, datayo a lima ket agingga alas dos metten a nagpapatang. Assesment iti okasion? Sangsangkaymaysa ti reaksion… balligi.

Kabigatanna, nupay napuyatantayo, nasapa tayo latta met a nakariing. Napintas man ti buya ti baybay iti kastoy nga agsapa. Low tide pay, gapu a ti white sands ket natingtingraw ti kinapudawna.

Namigattayo iti nipa hut nga adda iti asideg iti baybay. Mayat man ta buybuyaentayo ti kinadaeg ti baybay-Tsina.

Balligi wenno saan ti Iluko.com gathering? Daytoy man ti saludsod.

Unanimously, balligi ti panagsasarak. Nupay bassit laengen ti nakadar-ay, ngem naidumduma ti nagbalin a pasamak.

“Saan nga importante no dudua wenno adutayo a nakadar-ay, ti napateg ket naganastayo ti programatayo. Ket daytoy ti napateg.” Kinuna man ni Apong Leo. “Pukaw dagiti di nakaumay ti naisangsangayan a ragsaktayo.” Innayon pay ni Ankel.

Siempre, di napadasan dagiti classmate iti iluko.com nga absent ti nagtadek, ken saanda naramanan ti darakkel a maritangtang, ken nananam a karimbuaya ti lechon-baboy. Ngem kangrunaan ti amin, dida narikna ti naidumduma nga inganuattayo.

“Ngem rumbeng a pagyamanantayo da Arlane, LJ ken Monica, ta isuda ti manibela ti panakaisayangkat ti gatheringtayo.”

“Balligi agsipud ta nagdadanggaytayo.” Kinuna ni Arlane.

Iti listaan, adda duapulo ket walo a nakadar-ay iti programa, agraman dagiti bisita ken nagiparang iti pabuya.

Adda ti di nabusbos a P10,000.00 a pondo a daytoy ket maidonar iti World Vision Foundation tapno maitulong kadagiti agkasapulan a kakailian.

Adda pay dagiti nabati a regalo ket maited daytoy kadagiti ubbing iti day care, kindergarten, grade one ken two iti sumagmamano a barangay iti Santiago, Ilocos Sur. Ayna, ti iluko.com gathering, ket saan laeng a nagbalin a ragragsak ken tadtadek, no di ket nagbalin a rangtay tapno matulongan dagiti pada a nangisit ti sikona nga agkamtud iti panagkasapulan.

Nagballigi pay ti pasken gapu iti suporta dagiti iluko.com nangruna kenni Manong Andy a nupay di nakadar-ay ngem nagdakkel ti tulongna iti pasken. Pakairamanan pay kada Marvin Acosta, Dan Corpuz, Imelda Alimbuyog, Jeric Domingo, Pitong Cabreros, Leo Beligan, Ernie Coloma, Monica Smith, Dr. Jaime Raras, kangrunaan kenni Arlane Manzano ken ti kapamiliana a naturturtoran manipud iti panangbirok iti lugar a pakaisayangkatan ken iti panakaisagana ti taraon ken programa.

ADDANTO PAY NGATA?

Sapay koma ta addanto pay. Ta nupay makuna a balligi ti pasken, ngem adda latta met panakaupaytayo, nangruna dagiti tallo a marengska a da Monica, LJ ken Arlane agsipud ta adda dagiti nagikari a di nakaumay.

Ta daytoy met ti kangrunaan a gagem ti iluko.com, ti makapag-iinniliw iti internet, ken makapagsasarak kalpasanna.

Nagganas a panunoten, a dagiti Ilocano nga adda iti naduma-duma a suli ti lubong: mangmangged, agpaspasiar, agar-arapaap, ket agtutugmoktayo iti maysa a pagtaengan a sadino ket makapagkikinnaawatantayo iti balikas nga iluko, agpapada a makapagsida iti saluyot, agpapada a nangisit ti siko, ken kakitkitongan ti tunggal maysa.

Dayta ti iluko.com.

Ta bareng inton sumaruno, mapadasanton ni Manong Andy no kasano ti agtadek ken mangegtayon metten ti panagdaniw ni Manong Amado.

Ala, wen, kastan marengski ken parengski… intayonto agsasaraktayonto manen iti sumaruno nga Iluko.com Gathering.###

3 thoughts on “Iluko.com Gathering 2008

  1. hakhakhak! parengski danny… ladingitek unay ta naikapisak iti ragragsak iti aldaw a panangpadpadaan dagidi sumagmamano a mayat a makiam-ammo iti personal ken makialamano itoy numo. naitantan di biahek ngamin maigapu iti di napakpakadaan a pasamak dagiti natnatda a kabagian sadiay nanumo a taengmi iti bantay gusing, sarrat ilocos norte- ‘daak idi iti rabii, nagmayat man ti tungtunganmi kada marengski lj, arlane ken miss monica smith.

    palubos apo… mayakto manen iti sumaruno a gathering.

    =ian

  2. hello parengski Marv, agyamanak unay ta nakastrek ka ditoy nanumo a blog ko.
    Musta na ngay dita Maui…

  3. imbag nga orasmo parengski danny!

    siak ti umno nga agyaman kenka parengski, ta makastrekak nga awan ti tulbek… agyamanak panagtalekomo itoy numo.

    ti honolulu, oahu ti taeng ni nanangmi, a pakipagindegak, addaak pay laeng ita ditoy arizona. agawidakto no umay a lawas pay…

    da manong jerico ken manong cres yagin ti taga maui. maysa met ni manong cres a naayat a nangsupurta di umuna a gathering ngem daksanggasat ta saan a nakatabuno.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s