Luvtxt

Aldaw iti Huebes, iti opisina ti St. Stephen Manpower Recruitment Agency, naulimek a nakatugaw ni Katkat iti sanguanan ti lamisaanna a napunno ti papeles. Isuna ngamin ti sekretaria ti nasao nga ahensia. No kastoy nga addan iti laud ti init, bassiten ti matatao iti opisina ta manmano metten ti agap-apply. Intono sumaruno a lawas ket adda manen patayabenda a lima a mapan idiay Qatar, gapuna a ti managerna ket adda iti main officeda iti Makati kadduana dagiti aplikante.

Nangruna ta malem met, agtatakkon iti kuditkuditenna, imbag koma no adda umallatiw manipud iti bangir nga opisina ta pia la a pagsaritaanda iti panagsina da Angel Locsin ken Oyo Boy Sotto. Ngem awan met. Itayna pay laeng pagtayye-tayyeken ti ballpenna iti tamudona.

Nasalaw ti matana ti nabuntoon nga application letters dagiti kayatna mangged idiay abroad. Kinuditkuditna dagitoy a saggaysa, pia la a pagpalabasan ti oras. Idi makitana dagiti cp numbers dagiti aplikante, adda nagtayyek iti ulona nga aramidenna.

Inalana ti Nokia 3315 a cellphonena a madama ti chargingna. Ket tunggal numero dagiti aplikante ket i-miss callna. Sakbay pay a masungbatan daytoy dagiti aplikante, naiddepnan. Pagkiriringenanto manen ti sabali. Kasdiay a kasdiay ti inaramidna. Nagay-ayek-ek met a maymaysana.

Idi napalabas ti tallo a minutos, tunggal maysa kadagiti miniskolanna ket ag-textda metten. HU U?- wenno CNO KA?- Ngem dinan a sungbatan pay. Daytoy ti wagasna a nanglinglingay iti bagina.

Okey koman ti aldawna. Agkatkatawa koman iti pinapang-og nga aramidna, no di gapu iti maysa a text a naawatna a nangdurog iti panagbara ti piditpiditna ken nangpirdi iti aldawna a Huebes.

Oy, no awan ti maaramidmo, agpakamatayka laengen: LETSE! LASTOG! BASTOS! AGMAMAYET! Sender: 09194594030

No adda la koma tao iti opisinada, nakitanan ni Katkat a kasla pasayan a naisarabasab iti apoy ti rupana gapu iti panagpungerna. Ita laeng a napagsasaw-an iti agkakadakes a balikas. Dina pay nangeg dagitoy kenni Inangna, iti laketdin maysa a tao a dina pay am-ammo. No kasangsangona koma iti daytoy a gundaway ti nasao a tao ket nabekkelnan iti kasta unay nga irutna.

Agtigtigerger ti imana a nangtugkeltugkel manen iti keypad iti cpna tapno ag-text back.

Oy, pangaska met. AGUUYONG! KUAROG! UTTOT! MARABUTIT! AGKAKAMAT TI BAKET. Message sent

No adda koma pay mapanunotna a di malamot ti aso a balikas, sigurado nga igayangna amin daytoy iti text messagena agingga a maibus ti 459 a characters ti write messages ti cellphonena.

Ngem kas kenkuana, saan met a basta agpaatiw lattan ti text enemyna. Addan nga insigida ti responsena.

Uray ket cno ka, BANGET! Agparangka man ta tadtadenka a ksla SAPSAPURIKET! DUOY! Sender: 09204594030

Nakarkaru manen ti siudotna. Ngem sakbay a sinungbatanna, inalana pay dagiti application letters ket sinukisokna no asino kadakuada ti akinnumero iti nangdadael iti aldawna.

Saan met a narigatan ta nakitana nga insigida. Ket maysa a lalaki. Kas maibasar iti ladawan a naipigket, mayat ti pidas ti medio panguloten a buok, natundiris ti agong, napuskol ngem kasla nalamuyot a bibig, kasla mangay-ayo a mata—kayatna a sawen… nataraki. Agap-aplay a para Dubai. Neps Tangquiran ti naganna. Ngem saan a dayta ti rason tapno dina patulan ti nasao a lalaki. Nakarkaru ketdi ta natakkuatanna a lalaki gayam daytoy. Dagiti manglokloko a lalaki, kas iti ex-boyfriendna.

Sinungbatanna manen ti kagurgurana a lalaki.

Xak laeng met ti scrtary ti pagap-aplyam. LOKO! TARANTADO! Pinagringko ta cpm ta upd8tka koma ti aplksionmo. Message sent

Nabayag sakbay a simmungbat ni Neps a nangbad trip kenkuana. Idi kuan, nag-ring ti cellphonena, idi kitaenna… 09204594030. Saanna a sinungbatan. Amkenna a no sungbatanna ket pagsawsawan isuna ti nasao a lalaki. Dinto ket makabalesen ta bassit metten ti loadnan.

Nauma ngata met laengen, nakuna ni Katkat idi nagsardeng met laengen ti Hawak Kamay a ringtonena. Ngem idi agangay, naguni manen ti naka-level five nga message alert tone ti cellphonena. Inalana ket binasana.

Mam, sori, kala ko kc, ung mga nanggu-gudtym na nmn. Sender: 09204594030

Nakaanges iti nauneg ni Katkat, ngem kinunana: “’Ta man.” Saannan a sinungbatan ti text. In-phonebookna ketdi ti numero ti nasao a lalaki ket pinanagananna daytoy ti… BALINTUNGEG!

TITIT! TITIT!

Kasla ammon ni Katkat no asino ti naggapuan ti text…

Message received: Mam, sori talaga, txtbak u naman me, plis. Sender: Balintungeg

Wen, ni Neps manen. Saanen a nagsardeng ti idadawatna iti pammakawan. Addan makalawas nga awan sarday ti panag-textna, ket atapenna a naka-unlimited daytoy. Ngem di latta met ikaskaso ti balasang.

Ngem marengrenganen ni Katkat iti agsasaganad a panag-text ni Neps aka Balintungeg. Agteks la ngaruden, naglaing pay nga agpa-ring iti cellphone. Kamaudiananna, nagpambaren.

Sori ka, last txt me na, awan lodkon ta nagkol kanina ang bf ko. Send… message sent

Awan pay ti boyfriend ngem tripna laeng ti makibinulatsing kenni Neps. Kaadu ti loadna ita ta kaloloadna idi kalman. Unlimited pay.

Nagur-uray iti teksbak ni Katkat ngem awan ti naurayna. Impagarupna a nauma met laengen iti panangrengrengrengna. Wenno nagsanuden ta naammuanna nga addan bfna. Wenno nag-expire metten ti unlimitedna.

Ngem kalpasan iti maysa nga oras, naguni ti message alert ti cpna.

14539-5649-95849, prepaid e2, tapno 4give u na me. Sender: Balintungeg

Immisem ni Katkat. Kasta koma kanayon, kunana iti unegna. Maawatanna nga aramiden amin ni Neps tapno laeng mapakawanna. No ar-arigen ket saan met a nadagsen ti naaramidna a basol. Ket no talaga nga amirisen, isuna pay koma ti dumawat iti pammakawan ta isuna ti nanipudan ti basol.

Ni Neps ti costumer ti agencyda, gapuna nga isu koma ti rumbeng nga agpauyo iti panangbad tripna. Ngem ngata, interesado laeng ni Neps a makapangged iti abroad, ket agdanag nga amanganto ketdi a tipdenna ti aplikasionna iti agencyda. Ngem adayo met nga aramiden dayta ni Katkat, ta isuna ngarud ti agipatpatulod kadagiti kayatna a rumang-ay iti panangbiag.

Ok k mt gayam, cg, absueltokan. Tnx sa lod. Send… message sent

No problem, eniwey, mbln a txtm8t ta, curiousak ngmin kenka. Sender: Balintungeg

Preskoka metten, pinakawankan, ita, txtm8t. dahan-dahan naman, bro. Send… message sent

U wont regret pg naging txtm8t tau, kc, malambing me. Sender: Balintungeg

Sumungbat koma manen ni Katkat idi apagisu met nga adda simrek iti opisinada a sabali manen nga aplikante.

Kalkalpas a nag-review ni Katkat kadagiti aplikante iti dayta a rabii ket iridepna koman idi naguni ti cellphonena a nakaparabaw iti bassit a lamisaan a kaabay ti papagna. Insigida nga inalana daytoy ket binasana ti teks.

Wat mkes pipol cute s dat wen dey bgin 2 cre & shw sum cncern 2 othr pipol… Syanga pla, kumain k n b? Ingat k lgi ha! Sender: Balintungeg

Manipud idi sinungbatanna ti teks ni Neps, kanayunenna metten ti mangipatulod kadagiti SMS a nasam-it a basaen. Sweet nothings, kas kunada iti English, ngem forwarded laeng. No dadduma, saanna a sungbatanen ta masiudot met. Ngem no kasdiay, insigida nga adda maipatulod a load. Inkapilitan nga agteksbak to manen.

Uy, mturog na me, ag-txt k pi lng, n2na bgat 2 manen, ok. Send… message sent

K, c u n my drems. Sender: Balintungeg

Jak kayat nga adaka, bka mabangungotak. Send… message sent

T kunam ketdi, bka ma-nlab u 2 me. Sender: Balintungeg

Ay, ang kapal, aglidlidka mn tapno umimpiska. Me, ma-nlab sau. NEVAH!

Send… message

Bat gilty ka, tska, bkt nagba-blushka, he he, inlab k nga! Sender: Balintungeg

2log n me, bee, d ko na bnasa sms u. Send… message sent

Oo nga, nagpigsa pay ti urokmo. Ngork! Ngork! Sender: Balintungeg

Cg na nga, masapa pa me 2n bgat. Gud nyt. Send… message sent

Gud nyt also, tek care olwys, coz I care 4 u. Sender: Balintungeg

Napawingiwing ngem napaisem ni Katkat iti nabasana, mariknana a bayat bumaybayag ti panagtintineksda kenni Neps ket sumamsam-it met ti langen-langenda. Ken wen, umas-asideg met ti riknana kenkuana. Kadagitoy tartaraudi nga aldaw, no agipatulod ni Neps, adda dagiti rikna a maanninawanna kadagiti teks. Kasla mangipadpadap-aw iti riknana.

Ket kadagita a sweet text messages, saanna metten kagura ni Neps. Kasla ketdi makilkilig. Madlawna payen, a no kasdiay nga adda sumangpet a textna, umun-una nga agkulibagtong ti lagto ti pusona sakbay a maluktanna ti mensahe.

Iti dayta a rabii, sakbay a naturog, linukatanna ti phonebook ti Nokia 3315na. binirokna ti Edit, sana intalmeg, binirokna ti nagan ni Balintungeg. Manipud iti Balintungeg, pinagbalinna daytoy iti… Honey Neps.

Ket iti dayta a rabii, intagtagainepna nga agpayso ni Neps. Addada kano iti maysa a hardin, ket iti aglawlawna ket dagiti naduma-duma a sabong. Nagpipintas ken nagbabanglo a sabong.

Agkinkinnamatda kano kenni Neps, ket idi damona ket saan kano a makakamat ni Neps isu nga inbunbuntogna ti panagtarayna. Ket idi nakamatan isuna ket inarakupna iti nakair-irot. Ket anian a kinaisangsangayan ti riknana, nga nga indennes ni Neps ti bibigna iti agur-uray a bibigna.

TITIT! TITIT!

Bigla a nakariing ni Katkat, naputed ti kasasam-itan koman a paset ti tagtagainepna. Idi kitaenna ti cellphone, nakasilaw daytoy, kayatna sawen, adda ti bigbigat a nangsurdo kenkuana.

Idi iggamanna ti cellphone, kayatnan nga ibarsak. No apayto met a nalipatanna nga in-Off. No asinoman ti nangistorbo, sigurado a makangeg kenkuana. Dadaelenna met ti aldawna.

Ngem…

Oy, bg10n, agriingkan, mam. Ops! Ops! Dka pi nga agsao, nka pi agmulugmog. Pero, tka, e2 muna. Tsup! Tsup! Gud am. Sender: Honey Neps

Sungbatanna koma met ngem naguni manen. Idi kitaenna, ni Neps met laeng.

Naay, ta mukat nagdakkel, guray, ikkatek. Ayan, wanen. Nee, ni muning, mabaddekam. Sender: Honey Neps

Uray nabitin iti tagtagainepna, ngem kasla kompleto met laengen ti bigatna ta ti met gayam prinsipena ti nangriing kenkuana. Ngem imbes a bumangon nga insigida, intuloyna pay laeng ti nagidda, sana inkidem dagiti matana. Uray nakariingen, kayatna nga ituloy kano ti nabara nga eksena iti tagtagainepna.

DINA maawatan ti riknana, inaldaw metten a birokenna ti teks ni Neps. No dina mangeg nga aguni ti message alert ti cpna ket agpupunger a kasla metten ag-menoupose. Kayatna ket tunggal minuto ket adda mabasana a teks ni Honey Neps.

Kasla nabaliktaden ti pasamak, idi ket isuna ti agpapauray iti teks, ngem ita ket ni Neps metten ti agpapauray ti teks. Ket kasla nagballigi ni Neps, ta no dadduma, dina mapuotan nga i-forwardan iti nasam-it a SMS daytoy.

Ket idi saan a nagbayag, nagunin ti cellphonena.

Anian a tarayna, namnamaenna a naggapu daytoy kenni Neps. Ngem naglaylay ti abagana ta kabarbaro met a numero ti nagparang. Nakarkaro manen ti pungtotna idi mabasana ti text.

Ei, can u b my textmate?

No makasao la koma ti cellphone ket nagsaon gapu ta nabekkelen iti nairut a panangpetpetna.

Hoy, me bf na ako.

Cno?

Neps ang neym nia. Sori ka, bagsak ka. Gudbye!

Naladawen idi mautobna nga amangan no ni Neps met laeng daydiay. Malagipna ngamin nga iti naminsan, sinubokna ni Neps iti kastoy a wagas. Binulodna ti cellphone ti maysa kadagiti gayyemna, ket imbagana a kayatna ti maki-textmate kenkuana. Ket anian a ragsakna, ta nakapasa ni Neps. Imbagana ngamin nga adda nobiana, ket Katkat kano ti nagan ti girlfriend. Ket isuna daydiay. Kasla naitayok ket ngarud ti pusona. Saan pay laeng napnek, bimmulod manen iti sabali a cellphone, ngem kaskasdi ti sungbatna. Awan kano sabali a babai iti biagna no di ni Katkat.

Sa ita, mapatugmokna: saan ngata a narikna ni Neps nga isuna ti nagteks, ket bimmales met daytoy. Bimmulod met iti sabali a cellphone, sa imbagana a kayatna met ti maki-textmate, ket idi ibagana nga adda bfnan, dinamagna met no asino. Ket isuna a dangnga, a dina la pinanunotna nga amangan no ni Neps daydiay. Imbagana ketdin ti naganna.

Ay, kababain! Nakunana iti nakemna. Di pay ket ammon ni Neps nga ay-ayatemna daytoy. Awan ti palimednan. Inappotna ti rupana, ta kasla makitkitana iti sanguananna ni Neps.

Idi naguni ti cpna, inikkatna ti appotna, sana insigida a pinidot daytoy.

Jak kayat koma nga i-txtka pi, ta kunam adda BFmon. Sori, ngem kasla in-labak kenka. Uray sadino ti kitaek, addaka. Pakawanennak koma, Kat, ngem… I Luv U! Sender: Honey Neps

Dina mailadawan ti kinaragsakna idi mabasana ti teks. Namitlona nga ipanga-pangato ti gemgemna sana kinuna ti: Yes! Yes!

Ngem nagsarimadeng idi maalana ti riknana. Pudno met la ngata nga ay-ayaten isuna ni Neps ket dina pay nakitkita a pulos. Aklonenna nga in-love kenni Neps ta nagtaraki ket ngarud. Ania ket ngatan nga irut dagiti arakupna. Ngem dina pay nakita isuna iti personal. Awan met ketdi malagipna a panangibaga ni inangna a pangit isuna.

Saan ngata nga agbirbirok laeng iti pagliwliwaan ni Neps bayat iti kaaddana ditoy Filipinas, ket isuna ti napagtripanna. Malagipna ket ngarud a sakbay daytoy nasam-it a langen-langenda ket nangrugida iti LQ. Nagtungpal daytoy iti panaka-develop ti riknana.

Ngem awan ti maaramidanna, ni Kupido met ngamin, pinanana ti pusona. Maysa pay, ag-Valentines Day laengen nga awan ti boyfriendna. Amakna pay a maysa a balasang, ket nakapamimid bayat a palpalabsenna ti bulan ti Pebrero nga awan man laeng ti nang-kiss iti lips na, ken agkuna iti… I Love You Katkat!

Ngem siempre, kas maysa a balasang, masapul nga agpangina. Inalana ti cpna, sa nag text back kenni Neps.

Chickboy ka kano met. Send… message sent

Hu sed dat! 1 woman man me. Idi naminsan, ada nagtxt kniak, txtm8t kano. Sori, kunak, ada luvkon—Kat ti neymna, kunak. Sender: Honey Neps

Malagipna ti inaramidna idi naminsan.

Hus, maniwala me sau. Send… message sent

Cge, mit tau para maniwala ka. Sender: Honey Neps

Ay, jak pay redi. Jak pi kayat. Send… message sent

Bsta, mit tau. Sa Sunday, sa Candon plza. Prob ko sau na luv kta. Pag dumating ka, luv mo rin me. Pag hindi dumating, d mo me luv. Di na rin ako pa2kita sau kailan man. Sender: Honey Neps

Nagmalanga ni Katkat. Awan pay planona a maki-eyeball kenni Neps. Adu ngamin dagiti question mark iti panunotna. Kasanon no ibaga ni Neps a pangit isuna? Kasanon no mang-good gudtym laeng gayam daytoy? Ken kangrunaan iti amin, amangan noisuna ti agbayad iti panag-snacksda?

Not yet, d pa me redi! Send… message sent

Red ti badok, black ti pants ko. 10am, andun na me. Candon plaza. C u luv. Sender: Honey Neps

Jak mapan, pkpkawan, mpanka a maymaysam. Dnak mauray. Send… message sent.

Ngem saanen a nag text back ni Neps. Agsakit la ket ngarud ti ulona a mangpanpanunot no maki-eyeball wenno saan. Ngem no indianenna, problemana met no ipaypayso ni Neps a saanton nga ag-text ken mangriribok kenkuana. Ket talaga metten a kailiwna ti panangriribuk kenkuana ti baro ta talaga a na-lovestruck isuna.

Inalana ti sarming, sinirpatna ti rupana. Awan met tarangidongna, ngem adda dua a kamurona. Timmurod met bassit ti agongna. Nakinis ken napudaw ti rupana. Ket ti lipsna, kasla naglamuyot nga i-kiss. Nabanglo ti sang-awna. Nupay saan unay nabun-as, ngem mayat met ti tangsit ti dua a pangawisna. Saan ngata met unay nababa ti tayagna a 5’2” iti 5’6” ni Neps.

Domingo.

Alas dies ti saritaanda kenni Neps, ngem 9:30 pay laeng, adda gayamen isuna iti Candon Plaza, impambarna ti advance a relona. Nakatugaw iti maysa a bench iti sirok ti kayo a gmelina, itay pay laeng nga agtaytayyek ti tengngedna no addan a simmangpet ni Neps.

Nasiputanna idi simmangpet ni Neps. Nagdalagudog manen ti puso ni Katkat. Talaga a nataraki ni Neps uray ania ti isusuotna. Agtala-talangkiaw daytoy. Amin a balasang a lumabas ket miraenna. Asideg met laeng ketdi ti ayanna, agarup ngata iti sangapulo a metros iti kanawanna. Saan a nakadkadlaw nga isuna ti ur-urayen ti baro ta adda sabali a balasang a katugawna.

Agalas diesen idi nag-text kaniana ni Neps.

And2 na me, wer u na? Sender: Honey Neps

Sinungbatanna met.

And2 pa me bhay. Send… message sent

Ngem timmaliaw kenkuana ni Neps. Dina impadlaw ti panagnerbiosna. Kunwari, kinitana ti kaabayna sana kinalbit sana iniseman. Nakigtot pay kaabayna ket immikay daytoy kenkuana. Timmakder ket pimmanawen.

Idi taliawenna ni Neps, limmipat gayamen daytoy ti puesto.

Wer u nab a? Sender: Honey Neps

Sakbay a simmungbat ket nagtalangkiaw pay ni Katkat. Idi adda makitana a maysa a balasang a nakatugaw iti maysa a logo, ket nakapanunot daytoy iti ideya. Napintas ti babai, naka-shades iti black, fitted a black a pantalon, ken tube a black a naparabawan ti narasay a nalabaga. Sakbay kenkuana, daytoy a babai ti malabasanna.

Naka-shades me ng black, dress na black at pants na black. Tumaliawka ditoy asideg ti gmelina. Siak daytoy nakatugaw.

Timmaliaw nga apayso. Umun-una a kinitana ti babai nga intudona, ngem kalpasanna ket insublatna nga isuna ti kinitana. Nagkibbayo manen ti barukong.

Siniputan ni Katkat ti yaasideg ni Neps iti babai nga intudona. Nagsardeng daytoy iti sanguananna. Ngem apagbiit laeng daytoy, ta kalpasan ti lima a segundo ket nagdiretso daytoy iti yanna. Bayat nga umas-asideg iti yanna ni Neps, in-inut nga indumogna met ti ulona bayat a kitkitaenna ti cellphonena.

Loklokuennak met. Ket no ni Eileen a girlfriend ti gayyemko daydiay. Saan a sika daydiay. Sender: Honey Neps

Apagisu a naguni ti selponna idi nagsardeng met iti sanguananna ni Neps. Idi tangadenna, nakasipot daytoy kenkuana. Idi kuan, nag-ring ti cellphone, idi kitaenna no sino ti tumawtawag… ni Neps. Idi taliawenna manen ni Neps, umis-isem a nakakita daytoy kenkuana.

“Kumustakan, Katkat.” Kinunana.

“Saan a siak.” Inlibakna.

“Kayatmo a pag-ringek manen ta cellphonemo?” Kunkunana pay laeng ngem pinag-ringnan nga agpayso. Iniddepna met laeng nga insigida. Saanen a dimmawat iti pammalubos, nagtugaw daytoy iti abayna.

“Kasano nga ammom a siak?”

“Siempre, ammok met ti nagaplayak nga agency. Immuna-unan a kinitaka iti agency a pagtrabtrabahuan. Ket insigida a nain-lovenak kenka.” Kinunana sana kinidag ni Katkat.

“No agsaoka, kasla metten nobianak.”

“Di ketdin… ti tulag ket no makipagkitaka kaniak ita, girlfriendkan. Ket nasapsapaka pay a simmangpet ngem siak. Ken wen, nag-sweet dagiti textmo kaniak. Isu a nobiakan.”

“Ay… iti text laeng daydiay. Sabali a chapter itan. Nalpasen ti text mate chapter. Isu nga, agaremka met a, uray kunwari laeng.” Kinuna ni Katkat nga umis-isem.

Ngem kasla na la makitkita ti part two ti relasionda. No iti text ket nagririda sada na-develop. Ita ngata a personaldan nga agam-ammo, ania ngata met a love story ti buklenda a dua. Naragsak la ketdi ti buklenda a love story.

gibus

3 thoughts on “Luvtxt

  1. OK TOY SARITAM KANAKAN. PINAGBALINNAK MET BIDA ITI DAYTOY PARTUAT TI NAALIKUTEG A PANPANUNOTMO. HE HE HE.

  2. The story is very common, but the way you presented it is just absolutely beautiful. The ending is a little bit overused, but it’s just good. I wonder how will you do it supposing you will end the story with another fight.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s