Bannawag Jubilee Tree Ken GUMIL Int’l Convention

Amado I. Yoro

“Planting rice is never fun….” malagipmo daytoy kailian? Panagraep. Panagmula. Panagitukit, ken panagtaraken, panangtarabay. Kasapulan amin dagitoy.

Wen, saan a barengbareng ti agraep wenno agmula.
Idi luktak ti pammasangbay a balikasko idi Setiember 6, 2009 idi maluktan ti 3rd GF International Conference, nadakamatko ti nanumo ken saan a napakpakadaan a itutubo ti maysa a bukel ti Gumil idi Agosto 13, 1996.

Adda giddato a nagkuna: This is the cream of the crop. Gumil Oahu, naipasngay.

Panangyuna, pananglukat, nakunami. Dagiti nangyuna wenno nanglukat isu dagiti aganay a 31 a katao, lider ti komunidad ti namuonan ti GO. Inyarigko idi dagiti agmulmula [the planters – the sewers], dagiti maimula, balikas man, kayo man ken aramid a naimbag, dagita ti rugi.

Ti kayo kunami a mangted ti buya ti aglawlaw, linong, pusaksak, mangtulong a mangummong ken mangipug-aw iti pul-oy a mangpasalibukag ti biag.

Dagiti simmarsaruno a nangidaulo ti GO, ninaganak iti Dagiti Agay-aywan wenno the caretakers, the implementors, ken dagiti tagasangal, ken mangiturturong. Silpo dagiti utek dagiti pampanunot dagiti nangitukit.

Ti maikatlo a panangiladawak dayta a 3rd conference ken dagiti agdama nga opisial, isuda dagiti padrino ken padrina. Dagiti sumupsuporta ken mangikalkalakag iti panagsayaat ti gunglo. Kasilpo dagiti nangyuna.

WEN, kayo a Banyan ti napili ti Gumil Oahu nga immula kas panangidaton iti maikapitopulo ket lima a tawen a selebrasion ti kasangay ti Bannawag Magasin, ti aglinawas nga Ilokano magasin a maipabpablaak iti Metro Manila.

Kaaduan nga Ilokano iti Hawaii ti agbasbasa iti magasin. Adu dagiti mannurat wenno adda dagiti grupo ti mannurat iti Hawaii ket maysa ti Gumil Oahu a nabangon idi Agosto 13, 1996.

Kas pannakidanggay ti Gumil Oahu, kabayatan nga agbakbakasion ditoy Hawaii ti agdama a presidente Elizabeth Madarang Raquel, kas maysa kadagiti sangaili iti kalkalpas a 3rd Gumil Filipinas International Conference a naangay iti tallo nga aldaw iti Setiembre 5,6,7 iti Pearl Country Club ken iti Philippine Consulate.

BANNAWAG DIAMOND JUBILEE TREE PLANTING ti awag daytoy a proyekto.

APAY A BANYAN TREE?

Kas iti Narra a nailian a kayo iti pagilian [Filipinas] natibker ken nalagda met a kayo ti Banyan. Addaan iti simbolo iti tipkel, ken kinaamnut ti ramut kas iti urat ti agtartaray a dara kadagiti urat ni Filipino. Ti Banyan ket maysa met a simbolo ti kinalagda. Addaan iti narnuoyan a sanga ken naberde a bulong.

Ti ania man a kayo, mangted iti salinong, anniniwan, pakasaritaan, ti tugot, ti lamiis, buya ken dadduma a saguday ti nakaparsuaan.

Mainaig iti sukisokmi, masarakan ti kadakkelan a banyan tree in Hawaii naimula idi 1873 idiay Lahaina, Maui, Courthouse, Samplakanna ti apagkatlo ti maysa nga acre wenno kagudua ti ektaria.

Ti kaduoganen a banyan tree, wenno sibibiag a kayo ti bonsai masarakan idiay Tainan, Taiwan iti aganayen a 240 a tawen.

Idi rinukodtayo ti pakaimulaan ti agarup 10 feet a banyan a patubo ni Ric [Agnes], iti 4 feet a saplak ti kabussogan a parte ti ubing a kayo, agarup a 20 a kadapan ti kaadayona iti agsumbangir a padana a kayo ti narra ken mangga.

Saplakanto ti banyan ti agarup 15 a kadapan iti pannakadanonanna iti agarup 30 feet iti katayagna, ket makiinnartapto kadagiti dua a kaabayna a kayo.

[Malagipmi kas community volunteer, dagiti kayo nga immulmulami kas proyekto ti MOTTEP, Lion Club, Make America Beautiful ken iti Filipino Centennial Celebration Commission a nakipagmulakami. Masarakan iti Farrington Hwy, Waianae, St. Joseph Church, Waipahu, August Ahrens Elementary School, Waipahu, FilComCenter, Waipahu, Magic Island-Ala Moana Beach Park, banag a makapasalibukag rikna itan a makita dagiti a nalangtoda, ken makainayon ti napintas a buya iti aglawlaw]

Iti nabasami a sinurat da Severino Pablo ken Elizabeth Raquel iti Segden a publikasion ti Gumil Ilocos Norte, kastoy:Inyusuat ti Gumil Ilocos Norte ti panagitukitna kadagiti kayo kas panangipamatmatna iti umadanin a Diamond Jubilee ti Bannawag iti umay a Nobiembre 2009. Babaen iti panangidaulo ni Mrs. Elizabeth Madarang Raquel, presidente ti Gumil Filipinas ken Gumil Ilocos Norte, nagkaykaysa dagiti opisiales ken kamengd a nangannong iti nasao a tree planting iti Bacarra National Comprehensive High School, Bungon, Bacarra, Ilocos Norte, Don Salustiano National High School, Piddig, Ilocos Norte, Currimao ken Batac.

Napintas daytoy a gannuat ti Bannawag ta malaksid a maitandudo ti nasao a magasin, ket babaen ti partisipasion dagiti Gumil Chapters, mapreserba ti aglawlaw”

“Ti kadakkelan a nagapuanan ti Gumil Ilocos Norte iti pannakaited kadatayo babaen iti DENR Provincial Office, ti lote ti Gumil Ilocos Norte nga aglawa iti three thousand two hundred square meters. Masarakan daytoy a lote iti igid ti baybay iti Barangay Estancia, Pasuquin, Ilocos Norte. Kayatko a mapaglupos daytoy a beach resort a pakapatakderan ti convention hall a mabalin a pakaangayan metten dagiti seminar ken workshop para kadagiti kamannurat” nadakamat ni Raquel.

ITI Philippine Consulate Ground a pinili ti Gumil Oahu a pakaimulaan ti Banyan tree, dagitoy dagiti nakipag-Labor Day iti Setiembre 7, Lunes, nakipagkali, nakipagmula ken dadduma a partisipante dagiti sumaganad:

Elizabeth Madarang Raquel, presidente ti Gumil Ilocos Norte ken Gumil Filipinas
Leo Fagaragan, PRO iti Gumil Metro Manila ken direktor ti Gumil Filipinas
Rizal Fernandez, Internal Vice president ti Gumil Oahu
Sandy Lasquero, External vice president ti Gumil Oahu
Ric Agnes, co-organizer ken adviser ti Gumil Oahu
Eddie Bueno, direktor ti Gumil Oahu
Jun Bermisa, auditor ti Gumil Oahu
Pastor Ferdinand, sangaili
Amado Yoro, co-organizer, immuna a presidente, agdama a direktor ti Gumil Oahu
Andy Barroga, dati a bise presidente ti Gumil Oahu, ken Webmaster-founder ti Iluko.com

Sakbay daytoy a tree planting project, naaramid ti Gala Night iti Pearl Country Club, Aiea, idi Setiembre 5,a nagsapataan dagiti baro nga opisial kas kada Gladys Menor, presidente; Rizal Fernandez, Internal vice president; Sandy Lasquero, external vice president; Nena Bueno, recording secretary; Emelyn Damo, corresponding secretary. Mila Fernandez, tesorera; Josie Lasquero, katulongan a tesorera; Jun Bermisa, auditor; Florie Fermin, PRO.

Dagiti direktor: Amado Yoro, Estrella Taong, Maggie Domingo, Beth Alimbuyuguen, Felipe Bayani, Eddie Bueno, Israel Savellano.

Divina Menor ken Paul Taong, marshal.

Mamagbaga da Judge Artemio Baxa [legal], Lito Alcantra, Andy Barroga, Joe Lazo, Ric Agnes, Flor Martinez, Francisco Ponce, Cles Rambaud. Immediate Past President ni Rafael Alimbuyuguen.

Sangaili ditoy ni Consul General Leoncio Cardenas, Consul Paul Cortez, Retired Judge Artemio Baxa, Norberto Bumanglag, Jr, Las Vegas, Nevada, Andy Barroga, Seattle, Washington; Monica Smith, Calgary, Canada, Johnnyric Domingo, Maui, ken dadduma pay.

Setiembre 6, naangay ti komperensia iti Philippine Consulate General. Sangaili dagiti naggapu iti Filipinas nga indauluan ni Elizabeth Raquel.

Ni Gladys Menor ti agdama a presidente ti Gumil Oahu.

Nabangon ti Gumil Oahu idi Agosto 13, 1996. Toy nagsurat ti nagpaay nga umuna a presidente manipud iti interim 1996-2001.

Napagkabsat ti Gumil Oahu ken Gumil Ilocos Norte idi 2006. Napagkabsat met ti Gumil Oahu ken Gumil Maui idi 2002.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s