Umarayattayo: Itden ti Puso, ti Ayat, ti Tiempo ti Naimpusuan a Tulong

Amado I. Yoro

Publicity Chairman, UFCH

 NO agkaykaysa, agtignay ken agtitinnulong dagiti gunglo a pagkamengan dagiti kadaraan, ipakitana ti pigsa, tunos ken pannakipagrikna a tumulong kadagiti biktima, nadangran a pamilia a dinalapus ti nadamsak, nadawel ken nakaal-alingget a panagdakiwas ti Typhoon Ondoy wenno Ketsana.

Ania ket ngaminen aya ti kinadawel ti bagyo ken layus. Awan ti lisianna, awan la ti dina serken sirok, uneg ti balay ken dagiti kalkalsada ken iskinita. Apay nga adda bagyo ken layus? Pannubok kadi amin dagitoy iti biag ti tao?

Kas met la sakit ti panawen no dumteng ti kastoy a panniempo. Ngem ti nakas-ang unay dagiti mabiktima, dagiti mapukaw a biag. Dagiti madadael a sanikua ket mairaman pay dagiti dinguen, dagiti alikamen ken aminen a naur-urnong ti tao iti panangbiagna.

Nakaam-ames.

Ket nagasgasattayo pay laeng banag a pagyamanantayo ken ni Apo Dios.

Ditoy ita a mabalintayo ti mangisingay iti saranay, arayat ken tulong nga aggapu iti kaunggan ti pusotayo. No mabalin pay, agboluntario kadagiti panagur-or. Tumipontayo a makipagurnos kadagiti ania man a donasion, kuarta man ken dadduma, tapno lumag-an ti trabaho dagiti kakabsat a mangiganggannuat itoy.

Ita a sursuratenmi daytoy, Oktubre 1, kalpasan ti panagtitipon ditoy Filipino Community Center dagiti dadaulo dagiti maseknan a grupo a pakaibilangan ti Philippine Consulate, Radio Station KNDI. Congress of Visayan Organization, United Filipino Council of Hawaii, Oahu Filipino Community Council, Honolulu  Filipino Junior Chamber of Commerce, Filipino Chamber of Commerce, Order of Knights of Rizal, Hawaiian Lodge of Free and Accepted Masons, Philippine Celebrations Coordinating Committee of Hawaii ken dadduma pay nga agtitinnulong a mangisayangkat itoy a gannuat.

Masindadaan nga agserbi dagitoy: Consul General Leoncio Cardenas, Consul Paul Cortes, Toy Arre, Serafin Colmenares, Raymund Liongson, Eddie Agas, Sr., Danny Villaruz, Jema Geronimo, Ilalo Parayno,

[Sakbayna, adda naangay a miting ti Ad Hoc Committee on Relief Fund Drive a nakipartisiparan dagiti dadduma lider ken kameng ti komunidad ken pakairamanan dagiti sumagmamano a volunteers para iti Oktubre 4 a Relief Drive]

Ti Filipino Community Center ti maysa kadagiti pagawatan kadagiti donasion a kuarta wenno tseke. Addanto live broadcast ti KNDI radio mangrugi iti alas dose y media aginggana iti alas tres y media iti malem ti Oktubre 4, 2009.

“Makipartisipartayo. Itedtayo ti ayat, saranay ken tulongtayo,” kinuna ni Eddie Agas, Sr. a presidente ti United Filipino Council of Hawaii.

“Dawatek a tunggal unit organizations iti Oahu Filipino Community Council ken kamengda ket makipagrikna ken makisinnaranay itoy a gannuat para kadagiti nabiktima ken dagiti pamiliada,” kinuna ni Danny Villaruz, presidente ti Oahu Filipino Community Council ken Ilocos Surian Assn of Hawaii.

“Uray bassit no agtaud iti kaunggan ti puso, dakkelen a banag dayta a maitulong,” agpada a kinuna da Jesse Pascual ken Fe Velasco, agpada nga opisial ti Divine Word College of Laoag College Alumni Assn of Hawaii, idi insingasingmi ti yaabuloy ti gunglo.

“We are very appreciative of the efforts of the Filipino and the larger community here in Hawaii in providing assistance to the Filipino people at this time of great need” kinuna ni Philippine Consul General Leoncio Cardenas. “We are in full support and will provide any assistance to push these efforts through”. innayonna.

Malaksid iti FilComCenter a pagawatan iti donasion, mairaman iti listaan a pagpuestuanto dagiti dadduma a volunteers dagiti nadumaduma a lugar kas iti:

Don Quijote Supermarket, Farrington Hwy, Waipahu

Kamehameha Shopping Center, North School St., Kalihi

Longs Drug Store, Bishop/Hotel

Longs  Drug Store, Kapolei Shopping Center

Longs Drug Store, Ewa Beach Shopping Center

WalMart Mililani

Longs Drug Store, Waahiawa

WalMart Pearl City

KMart Salt Lake

Philippine Consulate General, Pali Hwy

Manamnama met nga adda dagiti fund drive dagiti nadumaduma a gunglo kadagiti sabali nga isla iti kauai, Lanai, Big Island ken dadduma.

Mainaig iti Relief Fund Drive, aramiden met ti St. Paul’s Church, Honolulu, St. Judes Church, Kapolei, Sarrat Assn of Hawaii.

DWCLCAAH, Annak Ti Sinait, Ilocos Surian Assn of Hawaii ken dadduma pay.

Adda payen dagiti simbaan a nagtignay met nga agur-or iti tulong tapno isaranayda met kadagiti pamilia a nagsagaba iti damsak.

Iturong dagiti donasionyo iti Filipino Community Center, 94-428 Mokuola St., Suite 302, Waipahu, Hawaii 96797, payable to Filipino Community Center, for Philippine Relief Fund Drive. Agpatingga daytoy a kampania iti Oktubre 24, 2009.

Ni Serafin “Jun” Colmenares ti pangulo ti Ad Hoc Relief Fund Drive Committee. Isu pay ti agdama a Board of Director ti FilComCenter ken agdama nga Executive Director ti COVO, idinto a ni Geminiano Toy Arre, Jr. ti presidente ti FilComCenter.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s