2.4 Bilion Irrigation Project, Binisita ni PGMA

Namnamaen a makatulong kadagiti mannalon… ngem apay nga adda met dagiti maal-alindamag a sumagmamano a bumarangay ti agkedked.

27 nga aldaw kalpasan nga immay, simmarungkar manen ni Presidente Gloria Macapagal Arroyo iti Ilocos Sur.

 Ti Banaoang Pump Irrigation Project ti maysa kadagiti ginagara ni Mrs. Arroyo iti panagpasiar iti Region itay Enero 27, 2010 pakairamanan kadagiti sumagmamano pay a dakkel a proyekto iti deppaarna iti amianan.

Kinaddua isuna ni sigud a gobernador Luis Singson, ni gobernador Deogracias Victor Savellano ti Ilocos Sur, Cong. Ronald Singson, National Irrigation Administrator Carlos Salazar ken dagiti dadduma pay nga opisial ti probinsia.

Agarup tengnga ti aldaw idi simmangpet ti presidente iti barangay San Mariano a saksakupen ti Bantay, Ilocos Sur a nakaipasdekan met ti pump irrigation.

 Apaman a simmangpet, inisigida nga inlawlawag ni Salazar ti agdama a pagsasaadan ti proyekto kenni Presidente Arroyo.

Inlawlawagna nga agarupen iti 87 a porsiento ti nalpas iti proyekto ket ti nabatbati a di pay nalpas ket manamnama a makompleto agingga Mayo iti daytoy a tawen.

Nangiyab pay ti presidente iti maysa a mannalon tapno damagenna no makatulong met laeng daytoy kadakuada, banag a pinasingkedan met ti mannalon.

Ti proyekto a narugian idi Marso 2003 ket babaen iti panangilungalong ni sigud a diputado Salaknib Baterina.

Ti proyekto nga addaan pondo nga P2.4 a bilion ket nagsaad iti karayan iti Abra.

Daytoy ket mangpasayak kadagiti kataltalonan iti barbarangay a sakupen ti Bantay, Santa Catalina, San Ildefonso, Caoayan, Magsingal, Santo Domingo, San Vicente ken Vigan City.

Ti proyekto ket addaan iti agarup 1.2 a kilometro a tunnel, 22 a kilometro ti service main canal, 46 a kilometro a lateral canal, 170 a kilometro a drainage, 310 a kilometro a ditch ken 870 a kilometro a service roads.

Agarup iti 6,312 nga ektaria ti mapasayakanna a kataltalonan a namnamaen  a mangingato iti produksion iti apit dagiti mannalon. Makatulong pay daytoy tapno makissayan ti gastos dagiti mannalon ken trabaho kadagiti umili.

Kalpasan iti panangpasiarna iti proyekto, ditoyen a nangaldaw ni Arroyo kadduana dagiti opisial ti Ilocos Sur.

Maipalagip nga idi Desiembre 30 ket simmarungkar manen ni GMA ditoy Ilocos Sur babaen iti panagatendarna ken panangidaton iti sabong ni Dr. Jose Rizal, agraman iti panangdaliasatna iti kabarbaro a Banaoang Bridge.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s