Pastoral Statement On Political Violence

Patpatgenmi a kakabsat ditoy Ilocos Sur:

Saan a mailibak a ti kinaranggas ket nagbalinen a paset ti langa ti politika ditoy Pilipinas. Manipud pay idi tiempo dagiti “saka-saka” (private armies) idi dekada 60 agpapan ita, pagbutbutngan ti kaaduan daytoy probinsiatayo gapu kadagiti pammapatay, pamutbteng ken dadduma pay a kita ti kinaranggas a mainaig iti politika.

Maladingitankami a nakaammo nga itay nabiit laeng, dua manen a kakabsattayo a kandidato ti nagsagaba iti nakaam-ames a panakapapatay – da Artemio Tugade, a taga-Santa Maria ken ni Cecilio Tolentino a taga-Magsingal, agpada a kandidato a para SBM (konsehales iti ili).

Ti sibubukel a Simbaan ditoy Nueva Segovia nga idauluanmi, kondenarenna daytoy a kinaranggas ken kinaulpi, ken dagiti amin a kita ti panagabuso ti bileg wenno turay. Ti panagpapatay, panangranggas ken pamutbuteng ti pada a tao tapno matagikua ti saad ti turay ket maikaniwas it linteg ti Dios.  Ipamatmatda ti kina-awan panangipateg ti biag a sagut ti Dios. Ipakitada ti kinaawan panagraem iti kinatan-ok ti tao ken kinaawan panagbuteng iti Dios.

Ti kinaranggas a wagas-pulitika ipasimudaagna ti nakaru a kina-agum wenno kinagamrud iti turay (greed for power) dagiti sumagmamano a di pulos makonsensia a pumatay, manggundaway wenno agaramat kadagiti killo a pamuspusan tapno laeng matagikua ken agtalinaed iti saad ti bileg ken turay.  Iti kastoy a kasasaad, agbalin ti eleksion a bambanti wenno moro-moro agsipud ta daytoy a proseso agbalin a tengngel dagiti addaan bileg a mangkontrol iti resulta babaen iti panagpapatay, pamutbuteng, panagsuitik, panangallilaw wenno panaggatang. Amin dagitoy maikontra iti pagayatan ti Dios ket tubengda iti sapasap a panagdur-as wen igigin-awa iti biag.

Panawenen tapno agpatingga ti politika ti kinaranggas ken kinagamrud! Sangsangkamaysatayo nga agtignay tapno agbaliw ti langa ti politika! Nasken a tubngarentayo ti amin a kinakillo, panangallilaw ken pananggundaway.

Dawatenmi kadagiti amin a maseknan nga ahensia ti gobierno tapno tuntonenda ti naan-anay nga hustisia para kada Artemio Tugade, Cecilio Tolentino ken amin a biktima ti political violence. Maipamatmat koma a patas ti panakaipakat ti linteg ket awan pabpaboranna. Nasken a ti linteg birokenna dagiti nagbasol tapno ikaroda dagiti dakes nga aramidda. Kasapulan ti nainget a panakaipatungpal  ti election gun ban tapno maliklikan ti ad-adu pay a pasamak ti kinaranggas.

Dawatenmi kadagiti amin a kakabsatmi ditoy Ilocos Sur a makikaysa iti panakagun-od ken panakasalimetmet ti pudno a wayawaya, kappia ken gin-awa ti biag. Tapno mapukaw ti naranggas ken naagum a politika ket agari ti urnos, kappia ken gin-awa, nasken unay a tanangen ti intay panangpili kadagiti mangadaulo kadatayo. Liklikan ti panangibotos kadagiti tattao a narungsot, naranggas ken mannangallilaw. Saan nga ibotos dagiti naagum wenno nagamrud iti saad ken turay ta dayta a kinagamrud ti mangiduron ken mangsulisog kadakuada nga agaramat ti kinaranggas ken killo a pamuspusan tapno agtalinaedda iti kinaturay ket agtultuloy met ti pananggundawayda kadagiti umili.

Sitatalektayo a dumawat ti panangibabaet ni Apo Santa Maria, Nuestra Senora de Caridad, tapno tulongannatayo nga annakna iti misiontayo a panangbalbaliw iti langa ti kagimongantayo ditoy Ilocos Sur ket kalak-amantayo ti biag a nagin-awa.

Iti nagan dagiti amin a papadi ditoy Ilocos Sur

Most Rev. Ernesto Salgado, DD

Arsobispo ti Nueva Segovia

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s