Begnas

Idi panawen nga inda pinaglasatan
Dagiti tribu nga Igolot ken Tinguian
Tribu nga intay nagtaudan
Adda istoria nga inda nagtitinnawidan
Nga ugali da ken kannawidan
Manipud idi agpapan itan
No bulan ti Desiembre ti madanonan
A panagaani ti pagay iti kataltalunan
Aganida kadagiti diket a mara-owayan
Nga aramiden da nga iniruban
Bayuenda a pagsasangguan
Lallakay, babbaket, babbaro ken babbalasang
Agraman ub-ubbing adda met makilanglang
Ket naragsakda amin a mangan
Ditanto met nga isalaysay
Dagiti babbaket ken lallakay
Ti bilin ni Lumawig a nainget unay
Nga agiinnayat dagiti tattao a naynay
Pudpudno a panagiinayat
Agnanayon saan nga agkupas
Saan met a dumaan
Ti aramid pakakitaan
No madanon ti bulan ti Enero
A nalpasen ti panaagapit
Kadagiti mulada a nagkaadu
Yamanda ti napalalo.
Aramidento metten ti begnas
Agidaton kadagiti taraken a nabubun-as
Pagyamanda a sapasap
Iti bendision ni Kabunian nga inda nasagrap
Indanto metten rambakan
Agtutukarda iti ginaldingan
Nga indanto kumpasan
Iti tadek a lablabbaan
Dagiti babbaro ken babbalasang agdadanggay
A mangiyaweng iti uggayam ken salidummay
Binnag-oyos ken digdig-ay
Agdalleng met dagiti babbaket ken lallakay
Ket agiinumdanto met
Iti tubbog ti tapey a nasam-it
Pangpaganaygayda ken pagpakired
Iti bagbagida tapno pumaragsit…
Kasta ti panagrambak
Dagiti tattao idi un-una
Iti bulan ti Desiembre ken Enero no magtengan
Awan ti mabartek nga agwara-waya.

Indaniw ni:
Benjamin Martin
Daldagan, Galimuyod, Ilocos Sur

Insagana ken Insurat manen ni:
Constante Balanza
Bagani Campo, Candon City

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s