Dagiti Agtutubo Idi

Sarindaniw:  Benjamin ‘Ama Ammin’ Martin

 

The tribal children of Bago Tribe are getting ready to perform to Begnas Festival.

The tribal children of Bago Tribe are getting ready to perform to Begnas Festival.

Idi un-unana a tiempo

Dagiti annak nga agtutubo

Adda kabukbukodanda a gunglo

Ken obligasion a puersado.

 

Adda kano kadakuada mangidaulo

A mangiwanwan ken mangisuro

Kadagiti aramiden a trabaho

Nga aw-awaganda ti ‘bilango’.

Kas iti panagurnong to pagtungo

Iti paraangan ti dap-ay ti bario

Tapno adda pagtemtem dagiti lallakay

Ta aldaw ken rabii adda latta apuy ti dap-ay.

 

Adda met pagrebbenganda nga inda inpaay

Kadagiti babbaket ken lallakay

Kas koma no adda lakay wenno baket a magmagna

Ket adda agtutubo a kakuyogna nga awan awitna.

Pegrebbenganna a sublatan ti bitbit ti baket a kakuyogna

Tapno itulodna iti papananna

Maysa kadagiti kapatgan a sursuro kadakuada

A kas gameng ti kinabaknangda.

 

Ta no saan nga aramiden ti kasta

Umdas a pakabasolanna

Ket dagiti agtutubo a kakadduana

Karbenganda nga ipaayan ti disiplina.

Adda ngamin karbenganda

A mangator kaduada

A saanna a mangaramid ti karbenganda

Nga imbilin ni Lumawig kadagiti appoda.

 

Ket ti nagnagananda ti bilango

A mangidaulo kadagiti agtutubo

Bigbigen met dagiti padada nga agtutubo

Ta kabaelanna ti mangidaulo.

Ket no adda ti sapitenda

A makabasol kadakuada

Dua la a paset ti patod ti mabalinda

A pangator iti makabasol kadakuada.

 

Ti umuna ket ti pammagbaga

Ken ti maikaddua ket isu ti panangbautda

Ta saan met a maipalubos kadakuada

Ti panangiliwes ken panangpapanawda.

Dayta met ti gapuna

A no adda ti sapiten dagiti lallakayda

Mapanda met denggen ti ikaskastada

Tapno masursuroda ken maadalda.

 

Adda met masursuroda

A pangtulong kadagiti nagannakda

Agiinnamoyo iti panagobra

Tapno tulonganda dagiti nagannakda.

 

No madanon ti panangisangpetda

Kadagiti pagay nga inapitda

No iti rabii a nasilnag ti bulan

Mapan met agisang-at dagiti babaro ken babalasang.

Tapno dagiti nagannakda matulonganda

Ditanto met a masanayda

Kadagiti trabaho a makaited rang-ay

Tapno agbiagdanto a nanam-ay.

 

No madanon met ti tiempona

Nga iti begnas aramidenda

Tiempo met ti panangsursuroda

Nga agtukar ti gangsa.###

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s