Pawikan Sanctuary Iti Narvacan

(ni Rudy Contillo) Mabigbig ti barangay San Pedro, Narvacan, Ilocos Sur iti kinapintas iti aplayana. Puraw a kadaratan ti Makita iti aglawlaw, nalitnaw ti baybay a pakakalapan iti nadumaduma a lames.

Ngem malaksid iti kinatarnaw ti baybay iti San Pedro, adda pay sabali a pakabigbigan ti nasao a barangay iti agdama. Daytoy ti panagbalin ti barangay kas “Pawikan Sanctuary”. Kas kadagiti amin a shoreline barangays iti Narvacan, ken uray kadagiti kabangibang nga ili, ti San Pedro ti maysa a pagayuyangan dagiti pawikan. No dumteng ti bulan ti Disiembre, Enero ken Pebrero, ammo lattan dagiti lumugar a bumangkag nga agitlog dagiti pawikan iti kadaratan iti igid ti baybay.

Kasla adda nakem dagiti pawikan ta ammoda ti pangikutkotanda kadagiti itlogda tapno mapessaan. adu ti mangraem kadagiti agindeg iti San Pedro ta ammoda nga ilalaen dagiti pawikan. Saanda a kalapen a kas iti aramid ti dadduma. Ammoda ti kinapateg dagitoy a maibilangen nga endangered species. Imbes a kalapenda, isublida iti baybay. Ket dagiti met mapessaan nga itlog, ibulosda dagitoy iti baybay met laeng.

Kasta nga aramid dagiti agindeg ken opisial ti San Pedro nga idauluan ni PB Ernie Molina, ken dagiti Bantay Dagat, banag a pakabigbiganda unay– kas kenni Judy “Mayor” Collado, a mangipamaysa a mangsipsiput nga awan ti madangran wenno maala iti itlogna a pawikan.

Idi laeng Pebrero 8, 2021, indauluan ni Mayor Luis “Chavit” Singson, Bise Mayor Pablito Sanidad, Municipal Administrator Pablo Sanidad II, dagiti kameng ti Sangguniang Bayan, opisiales ti barangay, Bantay Dagat ken dagiti bumarangay ti nangibulos kadagiti napessaan a pawikan — sumagmamano nga aldaw laeng kalpasan ti panangibulos ti grupo da Bise Mayor Sanidad iti sabali pay a pawikan iti baybay tapno agbiag ken mangpaadu pay.

Naidumduma ti gundaway ta personal a kinadua ida ni Donna Faith Cabero, ti nabalangatan a Saniata Ti Ylocos 2021 a tubo mismo iti barangay San Pedro. Kaduada ti balasang a nangibulos kadagiti babassit pay a pawikan iti baybay.