Dagiti Agtutubo Idi

Sarindaniw:  Benjamin ‘Ama Ammin’ Martin

 

The tribal children of Bago Tribe are getting ready to perform to Begnas Festival.
The tribal children of Bago Tribe are getting ready to perform to Begnas Festival.

Idi un-unana a tiempo

Dagiti annak nga agtutubo

Adda kabukbukodanda a gunglo

Ken obligasion a puersado.

 

Adda kano kadakuada mangidaulo

A mangiwanwan ken mangisuro

Continue reading “Dagiti Agtutubo Idi”

NAINDAKLANKA A GAYYEM

Daniw ni: Aida Corazon Ballocanag

 

Mapagtalkan a gayyem manmanoka laeng

Kinatudio ken kinaimbag awan umasping

Aglabas ti aldaw, bulan ken tawen

Dimonto kunaen a sika ti lipaten.

 

Awan kapada kupkupikopam a kinatakneng

Nagasatka natallugodanka ti Apo a Manakabalin

Continue reading “NAINDAKLANKA A GAYYEM”

Ikkis Ti Candon: Marso 25, 1898

Virgilio S. Naungayan
Darapidap, Candon City

Lumabas dagiti tugot iti lanitok dagiti basnot
Iti panawen ti kullayot umukuok nga ut-ot
Rienda ti dangkok alimpatok ti kinarungsot
Gabsuon a tuok nagtalimudok a nakasiglot.

Nagumok dagiti dingraw, kumaw ken bakulaw
Iti ili nga inagaw ginamsaw pati kinapanglaw
Timek ar-araraw nagtagawataw a dung-aw
Nagintek ti am-ammangaw kimmubawbaw ti aligagaw.

Kutkutiman a dagensen nariing dagiti nakem
A kemkem iti gemgem buneng a natadem
Aneng-eng awan buteng nabibinigen a saem
Wayawaya allangonen inadipen ti panawen.

Continue reading “Ikkis Ti Candon: Marso 25, 1898”

Bantay Ansad

Maysaka a napintas a buya
Kas iti maysa a dayag mayarigka
Binaludnak ta kayawmo a nagpaiduma
Uray kasanot’ kangato bantay-barukongmo,
Sang-ataekto latta
Tapno innak imatangan pakabuklam
Nga ingget sadia
No addaak dita alimpatokmo
Umapay kakaimasan a rikna
Ket dagiti arapaapko maabelda
Bantay Ansad, babaen toy tugot-pluma
Adtoyak nga umay kenka umabrasa
Wen, saan nga umdas dagiti balikas
A pangibuksilak pammategko kenka.


Nepo T. Benitez Jr.
San Esteban, Ilocos Sur

Daniw Ti Callao Caves

(Aguk-ukagnak kadagiti daan a notebookko idi makitak daytoy journalko iti panagatendarko idi 2003 iti Gumil Convention idiay Penablanca, Cagayan. Maikaddua a tawenko iti panagsurat iti Iluko. Adda pay nasuratko gayam a diary… mayat.)

Danny Antalan

Anakko, maalliawka
Alinggaget ti lubong di agtalna;
Lumablabaga ti panagay-ayamda
Mangsakripisio iti biag;
Di agpabatubat misterio ti mikrobio
Ipawilna ti panagkita ken panaganges.

Ala, umayka iti saklotko
Ruk-atak dagiti danagmo:
Sinappuyot ti arkitekto nga angin
Pinalanas ti inheniero a karayan
Nagpunganan ti Sierra Madre
Mororan dagiti Ibanag ken Itawis.

Sumrekka iti arko ti nakaparsuaan
Ikutannak babaen iti matam
Umaliwaksayka iti baro a buya
Baro a lubong nga awan gura.
No rummuarka, baro a sika.

Dim’ aya marikna ditoy
Dagiti daniw ni Manong Pel.

Essem A Busel ‘Toy Pusok

(Naaddaanak ti gundaway a nangipakada iti panangiposte iti sumagmamano a gapuanan ni Bucaneg Awardee apo Edilberto Angco iti mapadayawanak iti panangpalubosna. Daytoy a daniw ket naipablaak iti Bannawag idi 1965 ken iti libro a Pamulinawen)

Edilberto Angco

Mapusek barukongko iti linnaaw
Ti parbangon namaris a parmata
Ket ti mainaw a riknak maibuyog iti sin-aw
Ken imnas iti kassangbay nga agsapa.
Bumangonak iti essem a busel ‘toy pusok
A mangidayyeng namnama a ray-aw
Kinataok nga aglupos iti bukodko a lubong
Tapno ruknoyak iti ayamuom ti panawen.
Ngem kapadpadko sanga iti nababa a langit,
Masip-ak iti allikubeng nadamsak nga anginna;
Ngem dagiti saringit, wen, dagiti saringit
Agsampagadanto iti sabali nga iririing.

Blog at WordPress.com.

Up ↑