Ayatko Kenka

Noli Pambid, Patungkaliw, GDP, Ilocos Sur

Ay-ayatek dagiti nagannak kenka ngem
Nagpaiduma ayatko kenka
Nagrukma pusok babaen kadagiti
Dakulap a mangapiras nasipukkel
A naipintak a sibubukel a ladawam.

Naamo ta rupam a kas sarsaritaenna a
Nasam-it no kanayon a sumarungkarak.
Adayo unay ti lugarmo Ambaynget
Ngem toy pusok kasta la unay gagetna

Pinunasam dagiti ling-et ket
Nariknak napudno a panagayatmo.

Agsubliak

Gemini 5

Manipud idi naiwawaak

Dana ti basol ti nagnaak

Oh, Apo, umayak ket agsubliak

Ayatmo itdem ket awatennak

Dinadaelko adu a tiempo

Agbabawiak kadagiti basol

Agtalekak saom, patiek

Masakit daytoy kararuak

Pabaroem pigsa namnamak

Ket, Oh Apo, agsubliak.

Tuyagak Manen Ti Baso Ni Ragsak

Nepo T. Benitez, Jr.

San Rafael, San Esteban, Ilocos Sur

 

Namimpinsanen a linipat ti gulib ti napalabas

Daydi baso da upay ken saem

In-inut a naep-ep, naglumen

Ket ti nakuyem a lubongko rimmaniag

Iti idadateng ti baro a malem

Tuyagak manen ti baso ni ragsak

Ngem saan a tapno aglemmesak gapu iti saem

Ita agpapasak ket lemmesek ti barukongko

Iti sam-it ti diro ti baro nga ayat

Ta ti kalman ket maysan a kalman

Sanguek itan ti agdamak

Iti sidong ti baro a lasbang.

DJ NG AKING RADYO

Kameah Pearl

 

Sa tuwing sasapit ang oras ng programa mo

Tanging bitbit ko ay ang aking radyo

Malambing boses na inaabangan ko

Na nagpapaganda ng araw ko.

 

Boses mong kay ganda, masarap sa tainga

Ako’y napahanga kahit di pa nakita

Di man kita makita at malayo ka

Parang kapiling ka at laging kasama.

 

Ikaw ang inspirasyon ko,

Maging sa aking trabaho

Wala ang pagod basta boses ay naririnig ko

Sa magandang programa mo DJ ng aking radyo.

Pagayam

by Kameah Pearl

 

Bayat panagdakkelko diak pulos ninamnama

A makasarakak napudno a pagayam a kas kenka

Sumangbay man adu a pannubok sarangatenta latta

Ania man a problema solbarenta amin ida.

 

Pagayam nga inpategko nasursurok ngem kabsat

Kadduak a nangbukel naidumduma nga arapaap

Arapaap a simple ken nalaka a matayab

Ta kas kababa ta maabot ni pugo a tumatayab.

 

Ngem saan a natungpal dagidi nga arapaap

Gapu ni pagayam napanen iti sabali a biag

Diak pulos ninamnama a kastoy ti pagtungpalanna

Inbatinakon ni pagayam nga agmaymaysa.

 

Saanko pulos a malipatan ti patpatgek a pagayam

Kanayonka latta a laglagipen uray addan sabali pagarian

Agyamanak imbatim a pakalaglagipan

Adu a pammagbaga, ragsak wenno liday.

Ipupusay Ni Ayat

Dan Neil Tagupa

Cabaritan, Sto. Domingo, Ilocos Sur

 

Naikari kadi a magsaten

Toy agngangabit a namnama

Awan kadin ti mamaayna

Maikapet a suero ni ay-ayo

Nairanta ngata nga agtungpal

Iti morge ni pannakapaay

Tapno maimbalsamo ni ragsak

Sa maikahon iti lungon ni liday

Masapul, aya, nga agdung-aw

Toy puso a naulila

Rumbeng kadi a masukal

Ti ibit ti wak

A nakasaganan a sumippayot

Iti di nakapudno a kararua

Kas man la kumpay ni patay

Ta bimmato a riknam

A manggudas ken karayo

Naitangkal rehas-panakaikulbo

Ala, bay-am ngarud

Nga agtokar ti musiko

Iti naladingit a samiweng

Bayat panakapatit kampana

A mangipasimudaag kaadda

Ti maitabon nga ayat

Itulokko ngarud a maitanem

Iti kamposanto ni saem.

Itag-aymo Latta Ta Kumudtar

(Ken ni OTIL)

 

Aggaraw manen ti bulbulong. Madamdama

magangtanen ti bombilia a manglapped

panagsaknap sipnget. Sakayam manen ti

34 ti tawennan a Suzuki 125 a mapan

sumakada sangabotelia a kumugtar

nga isu ti in-inutem nga ipadalan

karabukob a mawaw. Madamdama

saanton a gagangay ti kapigsa ti

karaoke a mangipatayab kanta

ti Juan de la Cruz band. Sabayannakanton

tay asom a ni Nasty Mac a mangkanta iti

Knock on Wood ni Victor Wood. Mapisang

manen ti ulimek iti Kurruoy. Daytoy

 laengen liwliwam ta napukawmon bileg

a saan a mapatumba ti agua de pataranta.

Maysa laengen a bote ti kabaelam sipud

addan da Is, Len, Sula ken Abbin. Dimon

nakasango da Abat, Tinoy, Balu ken Kikok.

sa ita dimteng manen ni Dowap nga

agdildilat no ibagam ti baka. Ti

iliblibasmo nga igatang stallion,

wafer itan ti isangpetmo. Ngem ita

a sardam itagaymo latta ta kumugtar

ta itangadko met toy San Mig Light. Ta

inkanton maturog, agurok. Masapanto

manen a riingennaka ti garakgak ni Dowap.

Ngem sakbayna sayaatem a templaen ta

baradibud ta dinto kas iti di

napagustuan ti idiar ni bumaket

no malipatam a bugguongan ti sidaen.

 

                                                Mancielito S. Tacadena

                                                Namruangan, Cabugao,

                                                2732 Ilocos Sur

Create a free website or blog at WordPress.com.

Up ↑