Mannalon Ti Tabako, Suportado Idiay Gregorio del Pilar

Tunggal mannalon maited kadakuada dagiti makinaria ken dadduma pay a kasapulanda iti panagtalon tapno dakdakkel ti apitenda.

Daytoy ti kalikagum ni Mayor Henry Gallardo iti Gregorio del Pilar iti agtultuloy a panangitedda iti suporta kadagiti mannalon.
Iti covered court iti sango iti municipal hall iti nasao nga ili, nakalinia dagiti kuliglig, hose ken ddduma pay a tulong a maited kadagiti mannalon.
Kinuna ni Mayor Gallardo nga isublida kadagiti mannalon dagiti rebbengna a pinagrigatanda iti panagtalonda iti tabako.
“Dagiti makitkitayo a kuliglig kada hose, naisangrat para kadagiti agmulmula iti tabako. Agmulada, makaawattayo iti (RA) 7171, isu agsubli kadakuada ti rebbengna a mapan kadakuada… sagmamaysa ti improgramami, no adda ti saan a maikkan tatta, intono next a share, dagiti met saan a nabenepisiaran ti maikkan.” Kuna ni Mayor Gallardo.
Iti Del Pilar, naammuan ken ni Mayor Gallardo a 30 percent manipud iti gross iti share-da iti excise tax iti RA 7171 ti direkta nga isubsublida kadagiti mannalon babaen iti libre nga abono ken dadduma pay a farm interventions.
Ti maal-ala nga excise tax dagiti local a gobierno ket dakkel a tulong iti panagdur-as babaen kadagiti proyekto kas koma farm to market roads at iba pang imprastraktura a naponduan iti nasao a buis.